| ᠪᠦᠰᠡᠭᠦᠢ ᠵᠠᠶᠠᠭᠠᠨ ᠤ ᠲᠤᠤᠯᠢ | ᠠᠯᠳᠠᠠᠳᠤᠶᠠᠭᠠ ︵ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠭᠠᠭᠴᠠᠮᠤᠳᠤ ᠪᠠᠯᠭᠠᠰᠤᠨ ᠤ ᠪᠠᠶᠠᠠᠴᠠᠭᠠᠨ | ᠭᠠᠴᠠᠭᠠ︶ | ᠠᠯᠳᠠᠨ ᠤᠷᠤᠭ ᠤᠨ ᠨᠠᠷᠠᠨ ᠬᠤᠶᠢᠮᠦᠷ ᠢ ᠭᠡᠷᠡᠯᠳᠦᠭᠦᠯᠭᠦ ᠭᠡᠵᠤ | ᠠᠰᠢᠳᠠ ᠶᠢᠨ ᠭᠡᠶᠢᠮᠦᠷᠢ ᠶᠢ ᠪᠠᠶᠠᠨ ᠳᠤ ᠪᠠᠨ ᠰᠢᠩᠭᠡᠵᠤ ᠲᠦᠷᠦᠳᠡᠭ ᠶᠤᠮ | ᠡᠴᠢᠭᠡ ᠲᠡᠭᠡᠳᠦᠰ ᠤᠨ ᠠᠯᠳᠠᠷ ᠢ ᠪᠦᠳᠦᠨ ᠡᠷᠭᠦᠵᠤ ᠶᠠᠪᠤᠬᠤ ᠭᠡᠵᠤ | ᠡᠩᠭᠡᠷ ᠤᠨ ᠢᠶᠠᠨ ᠰᠢᠯᠪᠢ ᠶᠢ ᠴᠢᠨᠳᠠᠮᠤᠨᠢᠯᠠᠵᠤ ᠤᠷᠠᠯᠠᠳᠠᠭ ᠤᠴᠢᠷ ᠲᠠᠢ | ᠰᠠᠭᠠᠯᠢᠴᠢᠨ ᠡᠵᠢ ᠶᠢᠨ ᠢᠶᠠᠨ ᠠᠰᠤᠷᠤᠤ ᠶᠡᠭᠡ ᠤᠬᠠᠭᠠᠨ ᠢ ᠦᠪᠯᠡᠵᠤ | ᠰᠠᠷᠠᠨ ᠭᠤᠸᠠ ᠦᠵᠡᠰᠭᠦᠯᠡᠩ ᠠᠯᠳᠠᠷ ᠢ ᠰᠡᠶᠢᠯᠦᠭᠦᠯᠦᠭᠰᠡᠨ | ᠰᠤᠳᠤᠨ ᠤᠬᠰᠠᠭᠠᠨ ᠤ ᠮᠢᠨᠳᠠᠰᠤ ᠵᠦᠭᠡᠯᠡᠨ ᠦᠷᠭᠦᠯᠵᠢᠯᠡᠯ | ᠮᠤᠩᠭᠤᠯ ᠪᠦᠰᠡᠭᠦᠢ ᠶᠢᠨ ᠵᠠᠶᠠᠭᠠᠨ ᠤ ᠲᠤᠤᠯᠢ | ᠬᠠᠨ ᠤᠷᠴᠢᠯᠠᠩ ᠤᠨ ᠡᠷᠡᠰᠢᠭᠦᠳ ᠵᠠᠩ ᠢ ᠤᠶᠠᠷᠠᠭᠠᠬᠤ ᠭᠡᠵᠤ | ᠬᠠᠷᠠᠬᠠᠨ ᠭᠡᠵᠢᠭᠡ ᠪᠠᠨ ᠬᠠᠭᠠᠯᠬᠤ᠂ ᠬᠠᠷᠢ ᠳᠤ ᠮᠤᠷᠳᠠᠳᠠᠭ ᠲᠠᠪᠢᠯᠠᠩ ᠲᠠᠢ | ᠬᠠᠨᠢ ᠶᠢᠨ ᠵᠠᠶᠠᠭᠠ ᠲᠦᠰᠢᠵᠤ᠂ ᠪᠦᠳᠦᠨ ᠵᠢᠷᠭᠠᠬᠤ ᠶᠢᠨ ᠤᠴᠢᠷ | ᠬᠠᠶᠢᠷᠠ ᠶᠢᠨ ᠰᠢᠵᠢᠮ ᠢ ᠨᠢᠭᠤᠴᠠᠯᠠᠵᠤ ᠵᠠᠩᠬᠢᠳᠳᠠᠭ ᠤᠪᠢᠳᠠᠰ | ᠴᠡᠴᠡᠭᠡᠰ ᠤᠨ ᠰᠢᠭᠦᠳᠡᠷᠢ ᠶᠢ ᠬᠢᠮᠠᠭᠠᠳᠠᠬᠤ ᠭᠡᠵᠤ | ᠴᠡᠮᠴᠡᠭᠡᠷᠭᠡᠨ ᠠᠯᠬᠤᠬᠤ ᠶᠢ ᠬᠢᠴᠢᠶᠡᠳᠡᠭ | ᠴᠢᠩ ᠴᠢᠩ ᠤᠨ ᠨᠢᠯᠪᠤᠰᠤ ᠪᠠᠨ | ᠴᠡᠯᠡᠭᠡᠷ ᠲᠠᠯᠠ ᠶᠢᠨ ᠵᠦᠭᠡᠯᠡᠨ ᠰᠠᠯᠬᠢ ᠪᠠᠷ ᠠᠷᠭᠠᠳᠠᠭᠤᠯᠵᠤ | ᠴᠢᠩ ᠬᠠᠶᠢᠷᠠ ᠶᠢᠨ ᠤᠷᠳᠤ ᠠᠴᠠ ᠤᠷᠳᠤ ᠠᠷᠭᠠᠮᠵᠢᠶᠠ ᠶᠢ | ᠴᠢᠯᠡᠭᠡᠷᠭᠡᠵᠤ ᠲᠦᠪᠡᠭᠰᠢᠶᠠᠯ ᠦᠭᠡᠢ ᠨᠠᠰᠤ ᠪᠠᠷ ᠢᠶᠠᠨ ᠰᠠᠯᠪᠢᠵᠤ | ᠴᠠᠰᠤ ᠢᠷᠭᠤᠢ ᠬᠤᠶᠠᠷ ᠤᠨ ᠡᠭᠡᠯᠵᠢᠨ ᠳᠤ | ᠴᠠᠩᠳᠠᠵᠤ ᠭᠠᠩᠳᠠᠵᠤ ᠪᠤᠭᠤᠷᠤᠯᠳᠤᠳᠠᠭ ᠶᠤᠮᠰᠠᠨ | ᠦᠷᠡ ᠶᠢᠨ ᠵᠠᠶᠠᠭᠠ ᠲᠤᠬᠳᠠᠬᠤ ᠮᠦᠴᠡ ᠠᠴᠠ | ᠡᠪᠡᠳᠭᠦ ᠡᠷᠭᠡ ᠦᠭᠡᠢ ᠲᠠᠪᠴᠢᠶᠠᠷᠢ ᠲᠠᠪᠳᠠᠵᠤ | ᠦᠭᠦᠭᠦ ᠡᠷᠭᠡ ᠦᠭᠡᠢ ᠬᠠᠶᠢᠷᠠ ᠠᠮᠢᠯᠠᠭᠤᠯᠵᠤ | ᠦᠪᠡᠷ ᠢ ᠪᠠᠨ ᠮᠠᠷᠳᠠᠬᠰᠠᠨ ᠵᠢᠷᠭᠠᠯ ᠳᠤ ᠲᠡᠪᠡᠷᠡᠵᠤ | ᠦᠷ ᠰᠦᠨᠢ ᠶᠢᠨ ᠬᠦᠢᠳᠡᠨ ᠵᠢᠪᠡᠷ ᠠᠴᠠ | ᠦᠮᠦᠭᠯᠡᠵᠤ ᠦᠷᠡ ᠪᠠᠨ ᠬᠦᠭᠦᠭᠦᠯᠭᠦ ᠳᠤ ᠪᠠᠨ | ᠦᠨᠡᠷᠭᠡᠵᠤ ᠬᠡᠵᠢᠶᠡ ᠴᠦ ᠠᠴᠢ ᠶᠢᠨ ᠬᠠᠷᠢᠭᠤ ᠬᠦᠰᠡᠭᠡ ᠦᠭᠡᠢ | ᠦᠷᠦᠪᠴᠢᠭᠡᠨ ᠬᠠᠶᠢᠷᠠ ᠶᠢᠨ ᠪᠦᠯᠢᠶᠡᠨ ᠰᠦᠨ ᠤ ᠤᠨᠳᠤᠷᠤᠭᠠ | ᠦᠰᠭᠦ ᠨᠠᠰᠤᠨ ᠠᠴᠠ ᠨᠢ ᠦᠳᠡᠯᠭᠦ ᠳᠤ ᠨᠢ ᠬᠦᠷᠳᠡᠯᠡ | ᠦᠷᠡ ᠶᠢᠨ ᠢᠶᠠᠨ ᠵᠠᠶᠠᠭᠠᠨ ᠳᠤ ᠲᠤᠰᠬᠤ ᠰᠡᠭᠦᠳᠡᠷ ᠢ ᠦᠷᠭᠦᠭᠡᠭᠦ ᠰᠠᠨ ᠭᠡᠵᠤ | ᠵᠤᠨ ᠵᠤᠨ ᠤ ᠲᠡᠭᠷᠢ ᠳᠤ ᠰᠠᠭᠠᠯᠢ ᠶᠢᠨ ᠲᠡᠭᠡᠵᠢ ᠪᠠᠨ ᠡᠷᠭᠦᠵᠤ | ᠵᠠᠭᠤ ᠨᠠᠰᠤᠯᠠᠬᠤ ᠦᠭᠡᠢ ᠪᠡᠶᠡ ᠪᠠᠨ ᠠᠯᠵᠢᠶᠠᠬᠤ ᠶᠢ ᠤᠮᠠᠷᠳᠠᠬᠰᠠᠨ ᠪᠤᠷᠬᠠᠨ ᠵᠠᠶᠠᠭᠠ | ᠬᠠᠨᠢ ᠪᠠᠨ ᠬᠦᠯᠢᠶᠡᠭᠰᠡᠨ ᠠᠮᠤᠭᠤᠯᠠᠩ ᠦᠳᠡᠰᠢ | ᠬᠠᠵᠠᠭᠠᠷ ᠤᠨ ᠴᠢᠮᠡᠭᠡ ᠴᠢᠩᠨᠠᠩᠬᠠᠨ ᠮᠦᠰᠢᠶᠡᠵᠤ | ᠤᠳᠤᠳ ᠤᠨ ᠭᠡᠭᠡ ᠲᠠᠢ ᠴᠠᠢ ᠪᠠᠨ ᠪᠦᠯᠢᠶᠡᠯᠡᠵᠤ | ᠤᠳᠤᠷ ᠤᠨ ᠵᠤᠨ ᠤ ᠰᠠᠶᠢᠬᠠᠨ ᠢ ᠲᠤᠷᠠᠰᠤᠩᠬᠠᠨ ᠰᠦᠯᠡᠵᠤ | ᠬᠠᠷᠢᠬᠤ ᠭᠠᠯᠠᠭᠤᠳ ᠤᠨ ᠡᠭᠡᠭᠦ ᠡᠳᠦᠷ ᠢ ᠲᠦᠰᠦᠭᠡᠯᠡᠵᠤ | ᠬᠤᠷᠭᠠᠨ ᠲᠡᠪᠡᠯ ᠢᠶᠠᠨ ᠡᠰᠭᠡᠵᠤ᠂ ᠬᠤᠤᠰ ᠦᠭᠡᠢ ᠵᠢᠷᠭᠠᠯ ᠢᠶᠠᠷ ᠤᠷᠠᠯᠠᠳᠠᠭ | ᠤᠶᠠᠬᠠᠨ ᠽᠠᠮᠪᠤᠯᠢᠩ ᠤᠨ ᠭᠡᠭᠡᠨ ᠠᠮᠢᠳᠤᠷᠠᠯ ᠤᠨ ᠲᠤᠤᠯᠢ | ᠬᠠᠶᠢᠯᠭᠠᠨ ᠴᠠᠶᠢᠯᠭᠠᠨ ᠪᠦᠰᠡᠭᠦᠢ ᠵᠠᠶᠠᠭᠠᠨ ᠤ ᠲᠤᠤᠯᠢ᠃ |