ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠠᠯᠪᠠᠨ‌ᠦᠢᠯᠡᠴᠢᠯᠡᠭᠡ
ᠪᠣᠷᠣᠭᠠᠨ ᠤ ᠮᠥᠩᠭᠦᠨ ᠰᠣᠨᠳᠣᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/4/22
      ᠬᠠᠯᠠᠭᠤᠨ ᠲᠣᠭᠤᠰᠣ ᠴᠣᠭᠰᠢᠵᠤ ᠮᠠᠨᠠᠷᠠᠭᠠᠳ ᠭᠠᠵᠠᠷ ᠤᠨ ᠬᠤᠶᠢᠬ᠎ᠠ ᠬᠠᠯᠴᠠᠷᠠᠮᠠᠷ ᠠᠷᠭ᠎ᠠ ᠠᠭᠠᠰᠢ ᠶᠢ ᠪᠠᠷᠠᠭᠳᠠᠭᠤᠯᠤᠭᠰᠠᠨ ᠵᠣᠨ ᠤ ᠪᠥᠩᠰᠢᠭᠰᠡᠨ ᠡᠳᠦᠷ ᠤᠳ ᠢᠳᠡᠭ ᠢᠳᠡᠭ ᠢᠶᠠᠷ ᠨᠣᠮᠣᠬᠠᠷᠠᠨ ᠨᠤᠮᠤᠶᠢᠵᠤ᠂ ᠳᠣᠯᠣᠳᠤᠭᠠᠷ ᠰᠠᠷ᠎ᠠ ᠶᠢᠨ ᠠᠷᠪᠠᠳ ᠣᠶᠢᠷᠠᠲᠤᠭᠤᠯᠤᠭᠠᠳ ᠳᠤᠷᠤᠨ᠎ᠠ ᠶᠢᠨ ᠴᠠᠭᠠᠨ ᠡᠭᠦᠯᠡᠨ ᠠᠴᠠ ᠰᠠᠭᠠᠮ᠎ᠠ ᠢᠪᠢᠯᠦᠭᠰᠡᠨ ᠳᠤ ᠬᠥᠮᠥᠨ ᠠᠮᠢᠲᠠᠨ ᠪᠠᠶᠠᠷᠯᠠᠬᠤ ᠦᠭᠡᠢ ᠴᠤ ᠶᠠᠭᠠᠬᠢᠬᠤᠪ᠃ ᠰᠠᠨᠰᠠᠷ ᠤᠨ ᠠᠯᠲᠠᠨ ᠠᠶᠠᠭᠠᠨ ᠳᠤ ᠬᠦᠴᠦ ᠰᠢᠮ᠎ᠡ ᠨᠢ ᠮᠡᠯᠡᠯᠵᠡᠵᠦ᠂ ᠮᠥᠩᠬᠡ ᠶᠢᠨ ᠴᠢᠨᠠᠷ ᠢᠶᠠᠨ ᠬᠤᠪᠢᠷᠠᠰᠢ ᠦᠭᠡᠢ ᠬᠠᠳᠠᠭᠠᠯᠠᠭᠰᠠᠨ ᠪᠣᠷᠣᠭᠠᠨ ᠥᠪᠡᠷ ᠢᠶᠠᠨ ᠨᠠᠷᠠᠨ ᠤ ᠰᠠᠳᠣᠨ᠂ ᠨᠠᠪᠴᠢᠨ ᠤ ᠠᠨᠳᠠ ᠶᠤᠮ ᠳ᠋ᠠ᠃ ᠠᠰᠤᠷᠢ ᠲᠡᠭᠷᠢ ᠶᠢᠨ ᠬᠡᠷᠡᠯᠳᠦ ᠴᠠᠭᠠᠨ ᠰᠦ ᠭᠠᠵᠠᠷ ᠤᠨ ᠵᠤᠯᠠᠢ ᠶᠢ ᠦᠨᠦᠰᠦᠨ ᠲᠠᠭᠠᠯᠠᠵᠤ᠂ ᠠᠰᠬᠠᠷᠠᠨ ᠪᠠᠭᠤᠬᠤ ᠨᠢ ᠭᠤᠶᠤ᠃ ᠨᠠᠮᠤᠭᠤᠬᠠᠨ ᠢᠶᠠᠷ ᠬᠡᠯᠬᠢᠶᠡᠷᠡᠨ ᠰᠤᠪᠤᠳᠤᠷᠠᠬᠤ ᠪᠣᠷᠣᠭᠠᠨ ᠤ ᠪᠤᠮᠠᠨ ᠲᠣᠰᠤᠯ ᠥᠩᠭᠡ ᠶᠢᠨ ᠲᠤᠩᠭᠠᠯᠠᠭ ᠯᠢᠩᠬᠤ᠎ᠠ ᠵᠠᠳᠠᠷᠠᠩᠬᠠᠨ ᠳᠡᠯᠭᠡᠷᠡᠬᠦ ᠮᠡᠲᠦ ᠮᠡᠯᠮᠡᠢ ᠪᠠᠨ ᠨᠡᠭᠡᠭᠡᠬᠦ ᠨᠢ ᠬᠠᠷᠠᠬᠤᠶ᠎ᠠ ᠦᠵᠡᠰᠬᠦᠯᠡᠩᠲᠦ᠃ ᠰᠢᠪ ᠰᠢᠷᠭᠠᠯ ᠨᠠᠷᠠᠨ ᠳᠤ ᠥᠳᠦᠨ ᠵᠢᠭᠦᠷ ᠢᠶᠠᠨ ᠲᠥᠭᠡᠨᠡᠭᠦᠯᠵᠦ᠂ ᠰᠡᠯᠢᠨ ᠳᠡᠪᠳᠡᠷᠢᠬᠦ ᠶᠢᠨ ᠤᠷᠮ᠎ᠠ ᠨᠢ ᠬᠤᠭᠤᠷᠠᠭᠰᠠᠨ ᠪᠣᠷᠣ ᠪᠣᠯᠵᠣᠮᠣᠷ ᠤᠨ ᠳᠠᠭᠤ ᠱᠤᠤ ᠴᠤ ᠮᠡᠳᠡᠭᠳᠡᠮ᠎ᠡ ᠶᠡᠬᠡᠰᠴᠦ᠂ ᠭᠠᠵᠠᠷ ᠲᠡᠭᠷᠢ ᠶᠢ ᠥᠯᠦ ᠦᠵᠡᠭᠳᠡᠬᠦ ᠰᠢᠵᠢᠮ ᠢᠶᠠᠷ ᠬᠤᠯᠪᠣᠨ ᠨᠠᠶᠢᠷᠰᠠᠭᠤᠯᠤᠭᠠᠳ ᠡᠷᠬᠡᠯᠡᠨ ᠵᠢᠷᠭᠢᠬᠦ ᠨᠢ ᠳᠠᠩᠴᠢ ᠵᠢᠷᠭᠠᠯᠲᠠᠢ ᠪᠥᠭᠡᠳ ᠰᠣᠨᠣᠰᠤᠭᠠᠳ ᠰᠣᠨᠣᠰᠤᠭᠠᠳ ᠬᠠᠨᠤᠰᠢ ᠦᠭᠡᠢ᠃     ᠢᠷᠡᠬᠦ ᠪᠣᠷᠤᠭ᠎ᠠ ᠬᠢᠭᠡᠳ ᠮᠢᠨᠤ ᠰᠡᠳᠬᠢᠯ ᠢ ᠪᠣᠯᠵᠣᠮᠣᠷ ᠬᠤᠯᠪᠣᠬᠤ ᠨᠢ ᠰᠢᠯᠦᠭ ᠮᠡᠲᠦ᠃ ︽ᠬᠥᠮᠥᠨ ᠵᠣᠨ ᠬᠢᠭᠡᠳ ᠠᠳᠤᠭᠤ ᠮᠠᠯ ᠤᠨ ᠮᠢᠨᠢ ᠵᠣ ᠲᠡᠨᠢᠢᠵᠦ᠂ ᠥᠯᠵᠡᠢ ᠠᠮᠤᠭᠤᠯᠠᠩ ᠤᠨ ᠤᠶᠠᠬᠠᠨ ᠳᠠᠭᠤᠲᠤ ᠱᠠᠨᠵᠠ ᠬᠠᠩᠭᠢᠨᠠᠵᠤ ᠯᠠ ᠪᠠᠶᠢᠪᠠᠯ ᠮᠢᠨᠤ ᠰᠡᠳᠬᠢᠯ ᠠᠭᠤᠵᠢᠷᠠᠨ᠎ᠠ᠃ ᠮᠥᠩᠬᠡ ᠨᠠᠰᠤᠲᠤ ᠠᠭᠤᠯᠠ ᠤᠰᠤ ᠪᠠᠨ ᠳᠦᠰᠢᠩᠭᠡᠨ ᠪᠠᠷᠠᠳᠠᠵᠤ᠂ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠴᠤᠭ ᠵᠤᠯᠪᠤᠭ᠎ᠠ ᠪᠠᠨ ᠪᠠᠳᠠᠷᠠᠭᠤᠯᠤᠩᠬᠠᠨ ᠠᠰᠠᠭᠠᠵᠤ ᠯᠡ ᠪᠠᠶᠢᠪᠠᠯ ᠮᠢᠨᠤ ᠵᠢᠷᠭᠠᠯᠠᠩ ᠲᠡᠭᠦᠰ ᠣᠷᠣᠰᠢᠨ᠎ᠠ︾ ᠭᠡᠵᠦ ᠬᠥᠭᠵᠢᠯᠲᠡᠢ ᠳᠠᠭᠤ ᠪᠠᠷ ᠢᠶᠠᠨ ᠴᠢᠬᠢᠨ᠎ᠡ ᠨᠠᠶᠢᠷᠲᠠᠢ ᠵᠢᠷᠭᠢᠯᠳᠦᠭᠰᠡᠨ ᠨᠤᠲᠤᠭᠴᠢ ᠪᠣᠯᠵᠣᠮᠣᠷ ᠤᠳ ᠪᠣᠯ ᠡᠨᠡᠷᠢᠯ ᠬᠠᠶᠢᠷ᠎ᠠ ᠶᠢᠨ ᠡᠯᠴᠢᠰ ᠶᠤᠮ᠃ ᠵᠣᠨ ᠤ ᠭᠤᠣᠯ ᠳᠤ ᠣᠷᠣᠲᠠᠯ᠎ᠠ ᠬᠦᠰᠡᠵᠦ ᠬᠦᠯᠢᠶᠡᠵᠦ ᠤᠳᠠᠭᠰᠠᠨ ᠪᠣᠷᠤᠭ᠎ᠠ ᠡᠴᠦᠰ ᠲᠡᠭᠡᠨ ᠱᠠᠭᠢᠯ᠎ᠠ᠃ ᠪᠣᠷᠣᠭᠠᠨ ᠤ ᠴᠠᠭᠠᠨ᠎ᠠ ᠨᠠᠷᠠ ᠬᠠᠮᠢᠭ᠎ᠠ ᠪᠠᠶᠢᠭ᠎ᠠ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ᠂ ᠡᠳᠦᠷ ᠤᠨ ᠬᠡᠳᠦᠨ ᠬᠢᠯᠠᠭᠠᠨ ᠤᠳᠣ ᠴᠤ ᠪᠠᠷ᠎ᠠ ᠦᠭᠡᠢ᠃ ᠵᠦᠪᠭᠡᠨ ᠨᠡᠯᠦᠶᠢᠭᠰᠡᠨ ᠴᠢᠭᠢᠭᠯᠢᠭ ᠦᠨᠦᠷ ᠯᠡ ᠲᠠᠯ᠎ᠠ ᠲᠠᠯ᠎ᠠ ᠠᠴᠠ ᠳᠣᠲᠣᠷ᠎ᠠ ᠣᠩᠭᠤᠶᠢᠲᠠᠯ᠎ᠠ ᠰᠡᠷᠢᠭᠦᠦ ᠲᠠᠲᠠᠭᠤᠯᠤᠭᠠᠳ ᠲᠠᠭᠠᠲᠠᠢ᠃     ᠵᠦᠰᠡᠷᠡᠨ ᠱᠠᠭᠢᠬᠤ ᠪᠣᠷᠣᠭᠠᠨ ᠤ ᠬᠠᠲᠠᠷᠢᠶᠠᠨ ᠳᠤ ᠠᠬᠯᠠᠬᠬᠠᠨ ᠲᠠᠯ᠎ᠠ ᠶᠢᠨ ᠠᠨᠢᠷ ᠦᠭᠡᠢ ᠪᠦᠭᠦᠨ ᠤ ᠲᠣᠷᠭᠠᠨ ᠮᠡᠳᠡᠷᠡᠬᠦᠢ ᠬᠥᠨᠳᠡᠭᠳᠡᠵᠦ᠂ ᠠᠶᠢᠷᠠᠭ ᠤᠨ ᠠᠮᠲᠠ ᠴᠡᠮᠴᠡᠭᠡᠨᠡᠬᠦ‍ ᠰᠢᠭ ᠠᠩᠬᠢᠯᠤᠨ ᠰᠡᠩᠭᠢᠨᠡᠭᠡᠳ ᠥᠩᠭᠡ ᠵᠢᠰᠦ ᠨᠢ ᠲᠤᠶᠠᠭᠠᠷᠠᠨ᠎ᠠ᠃ ᠪᠣᠷᠣᠭᠠᠨ ᠤ ᠢᠷᠠᠭᠤᠬᠠᠨ ᠭᠦᠭ ᠰᠣᠨᠣᠷ ᠢ ᠴᠡᠩᠭᠡᠭᠦᠯᠦᠭᠰᠡᠭᠡᠷ ᠣᠷᠲᠦ ᠶᠢᠨ ᠳᠠᠭᠤᠤ ᠶᠢᠨ ᠤᠪᠠᠳᠢᠰᠲᠤ ᠴᠤᠤᠷᠢᠶ᠎ᠠ ᠰᠢᠭ᠋ ᠭᠦᠪᠦᠯᠵᠡᠩᠭᠡᠨ ᠨᠠᠮᠵᠢᠬᠤ ᠶᠢᠨ ᠲᠡᠷᠡ ᠬᠦ ᠴᠢᠯᠦᠭᠡᠨ ᠳᠤ ᠠᠭᠤᠯᠠ ᠲᠠᠯ᠎ᠠ ᠨᠣᠵᠣᠭᠤᠷᠠᠨ ᠲᠠᠯᠪᠢᠭᠤᠷᠠᠭᠠᠳ ᠠᠭᠤᠵᠢᠭᠤ ᠨᠢᠭᠡ ᠠᠮᠢᠰᠬᠤᠭ᠎ᠠ ᠠᠪᠬᠤ ᠨᠢ ᠮᠡᠳᠡᠷᠡᠭᠳᠡᠨ᠎ᠡ᠃ ᠪᠣᠷᠣᠭᠠᠨ ᠤ ᠴᠡᠭᠡᠯᠬᠡᠨ ᠰᠢᠷᠤᠩᠬᠠᠢ ᠪᠠᠷ ᠰᠡᠷᠪᠡᠯᠵᠡᠨ ᠪᠣᠰᠣᠭᠰᠠᠨ ᠬᠡᠭᠡᠷ᠎ᠡ ᠲᠠᠯ᠎ᠠ ᠶᠢᠨ ᠪᠤᠲᠠ ᠰᠥᠭᠡᠭ᠂ ᠠᠭᠢ ᠲᠠᠭᠠᠨ᠎ᠠ᠂ ᠴᠠᠬᠢᠯᠳᠠᠭ ᠤᠨ ᠨᠠᠮᠠᠭ᠎ᠠ ᠦᠭᠡ ᠳᠠᠭᠤ ᠦᠭᠡᠶᠢᠬᠡᠨ ᠢᠶᠠᠷ ᠰᠣᠭᠲᠣᠭᠤᠷᠠᠨ ᠨᠠᠶᠢᠭᠤᠨ᠎ᠠ᠃ ᠡᠷᠳᠡᠨᠢ ᠶᠢᠨ ᠷᠠᠰᠢᠶᠠᠨ ᠠᠮᠰᠠᠭᠰᠠᠨ ᠡᠪᠡᠰᠦᠨ ᠤ ᠦᠵᠦᠭᠦᠷ ᠥᠭᠡᠳᠡ ᠭᠠᠭᠴᠠ ᠬᠤᠶᠠᠷ ᠭᠤᠯᠢᠶ᠎ᠠ ᠴᠠᠷᠴᠠᠬᠠᠢ᠂ ᠰᠢᠷᠭᠤᠯᠵᠢ ᠲᠡᠷᠢᠭᠦᠲᠡᠨ ᠪᠣᠯᠭᠤᠮᠵᠢᠲᠠᠶᠢᠬᠠᠨ ᠠᠪᠠᠷᠢᠪᠠᠴᠤ ᠰᠠᠶ᠋ᠢᠬᠠᠨ ᠨᠣᠷᠣᠭᠰᠠᠨ ᠡᠪᠡᠰᠦᠨ ᠤ ᠨᠠᠮᠠᠭᠠᠳ ᠭᠦᠯᠢᠭᠡᠷᠭᠡᠨ ᠲᠤᠯᠠ ᠬᠠᠯᠲᠤᠷᠢᠭᠠᠳ ᠤᠨᠠᠬᠤ ᠨᠢ ᠢᠨᠢᠶᠡᠳᠦᠮᠲᠡᠢ᠃ ᠳᠥᠵᠢᠷᠡᠭᠰᠡᠨ ᠭᠠᠩ ᠬᠠᠭᠰᠠᠷᠠᠭᠠᠨ ᠳᠤ ᠡᠰᠬᠡᠭᠦᠯᠦᠭᠰᠡᠨ ᠡᠪᠡᠰᠦ ᠨᠣᠭᠤᠭ᠎ᠠ ᠦᠶ᠎ᠡ ᠭᠡᠰᠢᠭᠦᠦ ᠪᠠᠨ ᠲᠠᠪᠠᠲᠠᠶᠢᠬᠠᠨ ᠰᠤᠨᠢᠶᠠᠵᠤ᠂ ᠠᠯᠠᠭ ᠨᠢᠳᠦ ᠪᠠᠨ ᠲᠣᠷᠮᠣᠰ ᠲᠣᠷᠮᠣᠰ ᠠᠨᠢᠪᠴᠢᠬᠤᠶ᠎ᠠ ᠠᠨᠢᠰᠬᠠᠨ ᠳᠡᠭᠡᠷ᠎ᠡ  ᠨᠢ ᠢᠷᠠᠭᠤ ᠤᠳᠬ᠎ᠠ ᠶᠢᠨ ᠰᠣᠪᠤᠳᠣᠨ ᠪᠥᠮᠪᠦᠯᠢᠭ ᠭᠢᠯᠲᠠᠭᠠᠨᠠᠨ᠎ᠠ᠃ ᠭᠠᠩᠳᠠᠮᠠᠯ ᠵᠣᠨ ᠤ ᠠᠩᠬᠠᠨ ᠤ ᠪᠣᠷᠣᠭᠠᠨ ᠢᠶᠠᠷ ᠡᠪᠡᠰᠦ ᠨᠣᠭᠤᠭ᠎ᠠ ᠰᠠᠬᠤᠯᠢᠭ ᠰᠣᠷᠭᠤᠭ ᠰᠤᠭᠤᠷᠠᠵᠤ᠂ ᠦᠬᠡᠷ ᠬᠤᠨᠢᠳ ᠭᠦᠢᠴᠡᠳ ᠴᠠᠳᠬᠤ ᠠᠷᠠᠢ ᠪᠣᠯᠤᠭ᠎ᠠ ᠦᠭᠡᠢ ᠴᠤ ᠡᠶᠢᠰᠢ ᠲᠡᠶᠢᠰᠢ ᠭᠤᠷᠢ ᠲᠠᠰᠤᠷᠠᠯ ᠦᠭᠡᠢ ᠪᠤᠬᠢᠨᠢᠳᠤᠨ ᠭᠥᠯᠢᠭᠡᠨᠡᠵᠦ᠂ ᠬᠠᠰᠢᠶᠠᠨ ᠠᠴᠠ ᠪᠠᠨ ᠰᠠᠶ᠋ᠢᠬᠠᠨ ᠴᠢᠯᠦᠭᠡᠯᠡᠭᠳᠡᠭᠰᠡᠨ ᠬᠠᠷᠠᠭᠤᠰᠣᠯ ᠭᠤᠮᠣᠳᠠᠯ ᠢᠶᠠᠨ ᠭᠠᠷᠭᠠᠬᠤ ᠭᠡᠰᠡᠨ ᠮᠡᠲᠦ ᠰᠡᠭᠦᠯ ᠢᠶᠠᠨ ᠰᠢᠷᠪᠠᠨ ᠢᠯᠠᠭ᠎ᠠ ᠰᠢᠮᠠᠭᠤᠯ ᠦᠷᠭᠦᠭᠡᠵᠦ᠂ ᠠᠷᠠᠮᠠᠭ ᠲᠠᠷᠠᠮᠠᠭ ᠪᠡᠯᠴᠢᠨ᠎ᠡ᠃     ᠪᠣᠷᠤᠭ᠎ᠠ᠂ ᠪᠣᠷᠤᠭ᠎ᠠ ᠬᠡᠮᠡᠨ ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨ ᠤ ᠤᠭ ᠠᠴᠠ ᠪᠠᠨ ᠬᠠᠶᠢᠷ᠎ᠠ ᠢᠷᠦᠭᠡᠯ ᠰᠢᠩᠭᠡᠭᠰᠡᠨ ᠪᠢᠯᠢᠭ ᠤᠨ ᠡᠭᠡᠰᠢᠭᠲᠦ ᠦᠭᠡᠰ ᠢ ᠡᠷᠴᠢᠲᠡᠢ ᠤᠨᠳᠤᠷᠤᠭᠤᠯᠵᠤ᠂ ᠢᠲᠡᠭᠡᠯ ᠢᠶᠠᠨ ᠳᠡᠭᠡᠵᠢᠯᠡᠭᠰᠡᠨ ᠤ ᠬᠠᠷᠢᠭᠤ ᠳᠤ ᠠᠮᠠᠨ ᠤ ᠪᠡᠯᠭᠡ ᠲᠣᠭᠲᠠᠭᠠᠳ ᠯᠤᠤᠰ ᠤᠨ ᠲᠡᠭᠷᠢ ᠷᠠᠰᠢᠶᠠᠨ ᠬᠤᠷ᠎ᠠ ᠪᠠᠨ ᠬᠠᠶᠢᠷᠠᠯᠠᠵᠤ ᠪᠠᠶᠢᠭ᠎ᠠ ᠨᠢ ᠡᠨᠡ ᠳ᠋ᠠ ᠭᠡᠵᠦ ᠵᠠᠯᠪᠠᠷᠢᠨ ᠪᠤᠳᠤᠬᠤ ᠳᠤ ᠪᠠᠶᠢᠭᠠᠯᠢ ᠠᠬᠤᠢ ᠪᠠᠨ ᠯᠡ ᠰᠢᠲᠦᠭᠡᠨ ᠪᠣᠯᠭ᠎ᠠ ᠭᠡᠬᠦ ᠳᠡᠭᠡᠳᠦᠰ ᠤᠨ ᠮᠢᠨᠢ ᠴᠠᠴᠠᠨ ᠰᠤᠷᠭᠠᠯ ᠡᠰ ᠴᠢᠰᠤᠨ ᠳᠤ ᠨᠢᠯᠴᠢᠭᠢᠨᠡᠭᠡᠳ᠂ ᠥᠰᠢᠪᠡᠯ ᠭᠠᠩᠳᠠᠭᠤᠯᠵᠤ ᠭᠠᠩᠰᠠᠷᠠᠭᠤᠯᠵᠤ ᠴᠢᠳᠠᠳᠠᠭ᠂ ᠥᠷᠥᠰᠢᠶᠡᠪᠡᠯ ᠠᠮᠢᠯᠠᠭᠤᠯᠵᠤ ᠡᠳᠡᠭᠡᠭᠡᠵᠦ ᠳᠡᠶᠢᠯᠳᠡᠭ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠶᠢᠨ ᠬᠡᠴᠡᠭᠦᠦ ᠶᠢ ᠬᠡᠯᠡᠵᠦ ᠥᠭᠭᠦᠨᠡᠮ᠃ ᠪᠣᠷᠣᠭᠠᠨ ᠤ ᠮᠥᠩᠭᠦᠨ ᠲᠤᠰᠣᠯ ᠭᠠᠵᠠᠷ ᠳᠡᠯᠡᠬᠡᠢ ᠶᠢ ᠳᠡᠪᠲᠦᠲᠡᠯ᠎ᠡ ᠮᠡᠯᠮᠡᠷᠡᠵᠦ᠂ ᠵᠠᠯᠰᠠᠨ ᠰᠥᠮᠪᠦᠷ ᠠᠭᠤᠯᠠ ᠴᠠᠶᠢᠷᠠᠨ ᠥᠳᠬᠡᠷᠡᠬᠦ ᠴᠠᠭᠠᠨ ᠮᠠᠨᠠᠨ ᠳᠤ ᠬᠤᠴᠢᠭᠳᠠᠭᠠᠳ ᠶᠠᠭᠤ ᠴᠤ ᠡᠰᠡ ᠦᠵᠡᠭᠳᠡᠪᠡᠴᠦ ᠲᠡᠷᠡ ᠵᠦᠭ ᠲᠤ ᠰᠣᠨᠢᠭᠤᠴᠢ ᠰᠡᠳᠬᠢᠯ ᠤᠨ ᠵᠢᠯᠣᠭᠤ ᠨᠢᠭᠡᠨᠲᠡ ᠠᠯᠳᠠᠭᠤᠷᠠᠭᠠᠳ ᠰᠤᠮᠤ ᠶᠢᠨ ᠨᠠᠭᠠᠳᠤᠮ ᠳᠤ ᠨᠠᠶᠢᠭᠤᠲᠠᠯ᠎ᠠ ᠰᠣᠶᠢᠭᠰᠠᠨ ᠠᠵᠢᠨᠠᠢ ᠭᠦᠯᠦᠭ ᠰᠢᠭ ᠴᠣᠪᠬᠤᠴᠢᠨ ᠲᠡᠮᠡᠦᠯᠦᠨ᠎ᠡ᠃ ᠠᠭᠤᠯᠠᠰ᠂ ᠡᠭᠦᠯᠡᠰ᠂ ᠪᠣᠷᠤᠭ᠎ᠠ᠂ ᠡᠪᠡᠰᠦ ᠴᠡᠴᠡᠭᠡᠰ᠂ ᠣᠢ ᠮᠣᠳᠣᠳ᠂ ᠵᠠᠮ ᠬᠠᠷᠭᠤᠢ ᠬᠢᠭᠡᠳ ᠪᠢ ᠡᠨᠡ ᠭᠱᠠᠨ᠎ᠠ ᠳᠡᠯᠡᠬᠡᠢ ᠡᠵᠢ ᠶᠢᠨ ᠢᠶᠠᠨ ᠠᠭᠤᠵᠢᠮ ᠡᠪᠦᠷ ᠲᠤ ᠨᠢᠯᠬᠠᠰᠢᠨ ᠡᠷᠬᠡᠯᠡᠭᠡᠳ ᠮᠢᠨᠤᠬᠢ ᠴᠢᠨᠦᠬᠢ ᠭᠡᠬᠦ ᠵᠠᠭᠠᠭ ᠵᠠᠪᠰᠠᠷ ᠣᠷᠣ ᠦᠭᠡᠢ ᠠᠷᠢᠯᠤᠨᠠᠮ᠃ ᠪᠣᠷᠣᠭᠠᠨ ᠤ ᠱᠠᠭᠢᠬᠤ ᠴᠢᠮᠡᠭᠡ ᠪᠠᠶᠢᠰᠬᠢᠭᠡᠳ ᠭᠦᠶᠦᠳᠡᠯ ᠳᠤᠮᠳᠠ ᠪᠠᠨ ᠰᠢᠷᠦᠭᠦᠰᠬᠦ ᠨᠢ ᠮᠠᠷᠲᠠᠭᠰᠠᠨ ᠢᠶᠠᠨ ᠦᠭᠡᠶᠢᠯᠡᠬᠦ ᠣᠨ ᠵᠢᠯ ᠤᠳ ᠤᠨ ᠭᠠᠩ ᠲᠦᠪᠡᠷᠭᠡᠨ ᠴᠤ ᠰᠢᠭ᠃ᠪᠠᠶᠠᠩᠭᠤᠣᠯ ᠬᠡᠮᠡᠬᠦ ᠡᠨᠡ ᠭᠠᠵᠠᠷ ᠤᠳᠠᠭᠠᠨ ᠵᠢᠯ ᠢᠳᠡᠭᠡᠰᠢᠨ ᠳᠠᠰᠬᠤ ᠳᠠᠭᠠᠨ ᠡᠷᠭᠢᠨ ᠲᠣᠭᠤᠷᠢᠨ ᠤ ᠠᠭᠤᠯᠠᠰ ᠲᠠᠢ ᠴᠠᠭ ᠦᠷᠭᠦᠯᠵᠢ ᠲᠣᠪ ᠳᠤᠭᠤᠶᠢᠬᠠᠨ ᠰᠢᠷᠲᠡᠯᠴᠡᠵᠦ᠂ ᠪᠠᠶᠠᠷ ᠪᠠᠭ᠋ᠠᠳᠤᠯ ᠪᠣᠯᠣᠨ ᠭᠤᠮᠣᠳᠠᠯ ᠪᠠᠴᠢᠮᠳᠠᠯ ᠤᠨ ᠦᠭᠡᠰ ᠢᠶᠠᠨ ᠢᠷᠤᠭᠠᠷ ᠢ ᠨᠢ ᠭᠦᠪᠢᠲᠡᠯ᠎ᠡ ᠰᠢᠪᠡᠨᠡᠬᠦ ᠳᠤ ᠡᠷᠲᠡᠨ ᠤ ᠴᠠᠶᠢᠯᠭᠠᠨ ᠵᠠᠩ ᠢᠶᠠᠷ ᠢᠶᠠᠨ ᠮᠡᠯᠡᠰᠬᠢᠲᠡᠯ᠎ᠡ ᠭᠥᠯᠢᠶᠡᠨ ᠠᠪᠬᠤ ᠳᠤᠨᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠣᠮᠣᠭᠰᠢᠵᠤ᠂ ᠨᠢᠭᠡᠨᠲᠡ ᠨᠥᠮᠥᠷᠦᠭᠡᠳ ᠢᠷᠡᠭᠰᠡᠨ ᠪᠠᠶᠠᠷ ᠦᠭᠡᠢ ᠪᠦᠭᠦᠨ ᠡᠷ᠎ᠡ ᠵᠣᠷᠢᠭ ᠢ ᠮᠢᠨᠢ ᠳᠠᠩᠳᠠ ᠮᠣᠬᠤᠭᠠᠬᠤ ᠬᠡᠮᠡᠨ ᠢᠪ ᠳᠠᠷᠤᠬᠤ ᠪᠦᠷᠢ ᠳᠤᠲᠠᠵᠤ ᠳᠤᠨᠳᠠᠷᠠᠰᠢ ᠦᠭᠡᠢ ᠳᠣᠲᠣᠭᠠᠳᠤ ᠢᠯᠴᠢ ᠲᠠᠮᠢᠷ ᠢ ᠲᠡᠨᠳᠡ ᠠᠴᠠ ᠪᠢ ᠣᠯᠳᠠᠭ ᠪᠢᠯᠡ᠃ ᠸᠧᠶᠧᠨᠠ ᠶᠢᠨ ᠠᠯᠲᠠᠨ ᠲᠠᠩᠬᠢᠮ ᠳᠤ ᠳᠠᠭᠤᠷᠢᠰᠤᠭᠰᠠᠨ ᠰᠢᠮᠫᠤᠨᠢ ᠬᠥᠭᠵᠢᠮ ᠤᠨ ᠰᠣᠩᠭᠤᠳᠠᠭ ᠠᠶᠠᠯᠭᠤ ᠰᠢᠭ᠋ ᠨᠠᠮᠢᠷᠠᠭ᠎ᠠ ᠪᠣᠷᠣᠭᠠᠨ ᠨᠠᠮᠤᠭᠤᠬᠠᠨ ᠵᠠᠪᠰᠠᠷᠯᠠᠬᠤ ᠶᠢᠨ ᠢᠯᠳᠠᠮ ᠳᠤ ᠭᠠᠳᠠᠭ᠎ᠠ ᠭᠠᠷᠪᠠᠯ᠂ ᠲᠤᠨᠤᠬᠰᠠᠨ ᠤᠰᠣᠨ ᠤ ᠵᠢᠷᠪᠢᠭᠢᠨᠡᠬᠦ ᠮᠠᠨᠳᠠᠯ ᠰᠢᠭᠦᠷᠦᠨ ᠡᠭᠦᠯᠡᠰ ᠤᠨ ᠰᠡᠵᠢᠭᠦᠷ ᠴᠡᠴᠡᠷᠭᠡᠨᠡᠨ ᠴᠠᠶᠢᠪᠠᠯᠵᠠᠬᠤ ᠪᠥᠭᠡᠳ ᠠᠳᠬᠤᠭᠠᠳ ᠠᠪᠤᠮᠠᠷ ᠲᠡᠶᠢᠮᠦ ᠣᠶᠢᠷᠠᠬᠠᠨ ᠴᠤ ᠳᠦᠷᠰᠦ ᠨᠢ ᠬᠤᠭᠤᠰᠤᠨ ᠤ ᠤᠴᠢᠷ ᠪᠠᠷᠢᠶ᠎ᠠ ᠬᠡᠮᠡᠨ ᠰᠡᠳᠬᠢᠯ ᠬᠡᠳᠦᠢ ᠭᠤᠷᠢᠳᠠᠪᠠᠴᠤ ᠰᠠᠨᠠᠭᠰᠠᠨ ᠳᠠᠭᠠᠨ ᠬᠦᠷᠴᠦ ᠥᠯᠦ ᠴᠢᠳᠠᠨ᠎ᠠ᠃ ︽ᠡᠭᠦᠯᠡᠰ ᠤᠨ ᠬᠤᠪᠢᠷᠠᠯ ᠬᠥᠳᠡᠯᠭᠡᠭᠡᠨ ᠳᠣᠲᠣᠭᠠᠳᠤ ᠰᠢᠯᠲᠠᠭᠠᠨ ᠲᠠᠢ ᠪᠠᠨ ᠠᠭᠠᠷ ᠮᠠᠨᠳᠠᠯ ᠤᠨ ᠬᠢ᠂ ᠭᠠᠵᠠᠷ ᠤᠨ ᠳᠡᠯᠭᠡᠴᠡᠨ ᠳᠠᠬᠢ ᠰᠠᠶ᠋ᠢ ᠶᠢᠨ ᠲᠡᠷᠡ ᠵᠢᠷᠤᠭ ᠪᠣᠷᠣᠭᠠᠨ ᠤ ᠰᠠᠪᠰᠢᠶᠡᠨ ᠳᠤ ᠠᠭᠤᠰᠤᠨ ᠵᠠᠳᠠᠷᠠᠵᠤ᠂ ᠮᠢᠨᠤ ᠤᠬᠲᠣ ᠮᠡᠳᠡᠬᠦ ᠦᠭᠡᠢ ᠥᠭᠡᠷ᠎ᠡ ᠣᠷᠣᠨ ᠳᠤ ᠰᠢᠯᠵᠢᠭᠡᠳ ᠶᠠᠩᠵᠤ ᠶᠠᠩᠵᠤ ᠶᠢᠨ ᠭᠡᠯᠪᠡᠷᠢ ᠭᠠᠯᠪᠢᠷ ᠪᠦᠲᠦᠭᠡᠬᠦ ᠪᠠᠶᠢᠬ᠎ᠠ ᠳ᠋ᠠ︾ ᠭᠡᠬᠦ ᠪᠦᠦᠷ ᠲᠦᠦᠷᠬᠡᠨ ᠣᠶᠢᠯᠠᠭᠠᠯᠲᠠ ᠪᠠᠷ ᠥᠪᠡᠷ ᠢ ᠪᠠᠨ ᠠᠷᠭᠠᠳᠠᠨᠠᠮ᠃     ᠵᠡᠭᠦᠨ ᠵᠦᠭ ᠲᠤ ᠬᠡᠪᠲᠡᠭᠡ ᠵᠠᠭᠠᠨ ᠤ ᠳᠦᠷᠢᠲᠦ ᠴᠠᠭᠠᠨ ᠣᠪᠣᠭ᠎ᠠ ︽ᠥᠩ ᠵᠢᠯ ᠤᠨ ᠬᠡᠰᠢᠭ ᠮᠠᠨ ᠳᠠᠭᠠᠨ ᠢᠷᠡᠯ᠎ᠡ︾ ᠭᠡᠭᠰᠡᠭᠡᠷ ᠬᠠᠷᠠᠭᠠᠨ ᠳᠤ ᠡᠯᠢᠭᠡᠰᠡᠭ ᠲᠦᠩᠬᠦᠶᠢᠵᠦ᠂ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠵᠦᠭ ᠲᠤ ᠦᠯᠢᠭᠡᠷ ᠦᠨᠡᠨ ᠬᠤᠶᠠᠷ ᠤᠨ ᠳᠤᠮᠳᠠ ᠮᠢᠩᠭ᠎ᠠ ᠮᠢᠩᠭᠠᠨ ᠵᠢᠯ ᠤᠨ ᠬᠠᠯᠠᠭᠤᠨ ᠵᠡᠭᠦᠳᠦ ᠪᠠᠨ ᠮᠠᠨᠠᠭᠰᠠᠨ ᠬᠠᠪᠬ᠎ᠠ ᠶᠢᠨ ᠡᠩᠭᠡᠷ ᠨᠤᠲᠤᠭ ᠤᠰᠤ ᠪᠠᠨ ᠬᠥᠳᠡᠯᠦᠰᠢ ᠦᠭᠡᠢ ᠰᠠᠬᠢᠨ᠎ᠠ᠃ ᠪᠣᠷᠣᠭᠠᠨ ᠤ ᠲᠤᠬᠠᠢ ᠮᠢᠨᠤ ᠮᠡᠳᠡᠬᠦ ᠦᠭᠡᠢ ᠭᠠᠶᠢᠬᠠᠮᠰᠢᠭᠲᠤ ᠤᠯᠠᠨ ᠦᠯᠢᠭᠡᠷ ᠲᠣᠮᠤᠭ ᠤᠳ ᠢ ᠲᠠᠨᠢᠯ ᠲᠠᠰᠤᠯᠬᠠᠨ ᠠᠭᠤᠯᠠᠰ ᠤᠨ ᠮᠢᠨᠢ ᠥᠭᠡᠬᠦᠨ ᠴᠠᠭᠠᠨ ᠴᠢᠯᠠᠭᠤᠳ ᠰᠢᠩᠭᠡᠭᠡᠵᠦ ᠪᠠᠷᠢᠨᠲᠠᠭᠯᠠᠭᠰᠠᠨ ᠭᠡᠵᠦ ᠢᠲᠡᠭᠡᠨᠡᠮ᠃ ᠠᠯᠢ ᠨᠢᠭᠡ ᠡᠳᠦᠷ ᠪᠣᠷᠣᠭᠠᠨ ᠳᠤ ᠱᠠᠪᠰᠢᠭᠤᠯᠤᠭᠰᠠᠨ ᠲᠡᠷᠡ ᠴᠢᠯᠠᠭᠤᠳ ᠠᠴᠠ ᠤᠷᠢᠳᠤ ᠶᠢᠨ ᠶᠠᠪᠤᠳᠠᠯ ᠤᠨ ᠣᠷᠬᠢᠭᠳᠠᠭᠰᠠᠨ ᠤᠴᠢᠭ ᠤᠳ ᠰᠣᠯᠣᠩᠭ᠎ᠠ ᠬᠥᠯᠭᠡᠯᠡᠨ ᠭᠦᠪᠦᠷᠡᠵᠦ᠂ ᠡᠭᠦᠪᠡᠷ ᠶᠠᠪᠤᠵᠤ ᠥᠩᠭᠡᠷᠡᠭᠰᠡᠨ ᠤᠬᠠᠭᠠᠨᠲᠤ ᠳᠡᠭᠡᠳᠦᠰ ᠤᠨ ᠮᠢᠨᠢ ᠬᠡᠯᠡᠭᠡ ᠦᠭᠡᠢ ᠦᠭᠡ᠂ ᠶᠠᠷᠢᠭ᠎ᠠ ᠦᠭᠡᠢ ᠵᠣᠭᠤᠭ ᠢ ᠬᠦᠦᠷᠨᠢᠬᠦ ᠪᠢᠵᠡ︖  ᠭᠠᠩ ᠬᠠᠭᠰᠠᠷᠠᠭᠠᠨ ᠡᠬᠢᠯᠡᠭᠡᠳ ᠵᠢᠷᠦᠬᠡ ᠵᠦᠰᠦᠮᠡᠷ ᠬᠡᠴᠡᠭᠦᠳᠡᠵᠦ᠂ ᠭᠤᠣᠯ ᠤᠰᠤ᠂ ᠬᠡᠭᠡᠷ᠎ᠡ ᠲᠠᠯ᠎ᠠ᠂ ᠡᠪᠡᠰᠦ ᠤᠷᠭᠤᠮᠠᠯ ᠲᠡᠷᠢᠭᠦᠲᠡᠨ ᠢ ᠲᠣᠯᠣᠭᠠᠢ ᠥᠨᠳᠡᠶᠢᠯᠭᠡᠬᠦ ᠦᠭᠡᠢ ᠳᠠᠷᠤᠭᠰᠠᠨ ᠪᠤᠯᠪᠠᠴᠤ ᠲᠡᠭᠷᠢ ᠶᠢᠨ ᠵᠦᠢ ᠪᠠᠷ ᠲᠦᠳᠡᠯ ᠦᠭᠡᠢ ᠬᠤᠷ᠎ᠠ ᠲᠤᠨᠤᠳᠠᠰᠤ ᠬᠠᠷᠠᠮ ᠦᠭᠡᠢ ᠪᠠᠭᠤᠬᠤᠶ᠎ᠠ ᠭᠠᠵᠠᠷ ᠤᠰᠣᠨ ᠤ ᠮᠢᠨᠢ ᠠᠯᠲᠠᠨ ᠮᠠᠬᠠᠪᠤᠳ ᠯᠠᠭᠰᠢᠨ ᠲᠤᠩᠭᠠᠯᠠᠭ᠂ ᠳᠣᠷᠪᠢᠯᠢᠭ ᠬᠦᠴᠦᠲᠡᠢ᠂ ᠢᠨᠢᠶᠡᠮᠰᠦᠭᠯᠡᠯ ᠳᠦᠭᠦᠷᠡᠩ ᠪᠣᠯᠤᠭᠰᠠᠨ ᠨᠢ ᠦᠨᠡᠬᠡᠷ ᠪᠠᠶᠠᠷ᠃     ᠬᠠᠪᠲᠠᠭᠠᠢ ᠴᠡᠭᠡᠵᠢᠨ ᠳᠤ ᠮᠢᠨᠢ ᠪᠣᠲᠣᠭᠤ ᠰᠢᠭ᠋ ᠪᠤᠶᠢᠯᠠᠩᠬᠠᠨ ᠭᠤᠩᠭᠠᠨᠢᠬᠤ ᠡᠯ᠎ᠡ ᠪᠦᠭᠦᠨ ᠤ ᠡᠬᠢ ᠠᠳᠠᠭ ᠢ ᠲᠤᠩᠭᠠᠨ ᠪᠤᠳᠤᠭᠠᠳ ᠰᠡᠷᠢᠭᠦᠨ ᠠᠭᠠᠷ ᠲᠤ ᠬᠠᠴᠠᠷ ᠢᠶᠠᠨ ᠢᠯᠪᠢᠭᠦᠯᠦᠨ ᠵᠣᠭᠰᠣᠲᠠᠯ᠎ᠠ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠠᠴᠠ ᠡᠭᠦᠯᠡᠰ ᠨᠡᠲᠦᠶᠢᠨ ᠨᠡᠭᠦᠳᠡᠯᠯᠡᠭᠡᠳ ᠪᠣᠷᠣᠭᠠᠨ ᠳᠠᠭᠢᠭᠠᠳ ᠤᠷᠮᠠᠲᠠᠶᠢᠬᠠᠨ ᠱᠠᠭᠢᠵᠤ ᠡᠬᠢᠯᠡᠯ᠎ᠡ᠃ ᠴᠣᠩᠬᠤᠨ ᠤ ᠰᠢᠯ ᠲᠣᠪᠰᠢᠯᠠᠬᠤ ᠳᠣᠯᠣᠳᠤᠭᠠᠷ ᠰᠠᠷ᠎ᠠ ᠶᠢᠨ ᠰᠢᠨᠡᠳ ᠤᠨ ᠪᠣᠷᠣᠭᠠᠨ ︽ᠰᠠᠶᠢᠬᠠᠨ ᠪᠦᠭᠦᠨ ᠠᠳᠡ ᠠᠴᠠ ᠡᠬᠢᠯᠡᠨ᠎ᠡ︾ ᠭᠡᠬᠦ ᠰᠢᠭ ᠥᠨᠢ ᠡᠷᠲᠡᠨ ᠤ ᠰᠤᠷᠠᠭ ᠳᠣᠬᠢᠶ᠎ᠠ ᠶᠢ ᠣᠶᠢᠷᠠᠲᠤᠭᠤᠯᠬᠤ ᠮᠡᠲᠦ ᠠᠰᠬᠠᠷᠠᠲᠠᠯ᠎ᠠ ᠱᠠᠪᠰᠢᠨ᠎ᠠ᠃ ᠵᠠᠭᠤᠨ ᠵᠠᠭᠤᠨ ᠤ ᠲᠡᠷᠲᠡᠭᠡ ᠠᠯᠤᠰ ᠲᠤ ᠡᠶᠢᠮᠦ ᠪᠣᠷᠣᠭᠠᠨ ᠥᠷᠭᠦᠭᠡ ᠴᠠᠭᠠᠨ ᠭᠡᠷ ᠤᠨ ᠬᠠᠶᠠᠭ᠎ᠠ ᠳᠤᠭᠤᠶᠢᠯᠠᠨ ᠡᠷᠬᠡ ᠲᠠᠩᠬᠢᠯᠬᠠᠨ ᠢᠰᠢᠭᠡ ᠰᠢᠭ ᠳᠡᠭᠳᠡᠨ ᠲᠣᠩᠭᠤᠴᠢᠨ ᠭᠦᠶᠦᠯᠴᠡᠵᠦ᠂ ᠶᠢᠷᠲᠢᠨᠴᠦ ᠶᠢᠨ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠢ ᠴᠢᠬᠢ ᠪᠠᠨ ᠳᠡᠯᠳᠡᠶᠢᠯᠭᠡᠨ ᠴᠢᠩᠨᠠᠬᠤ ᠲᠥᠷᠬᠦ ᠨᠢ ᠰᠡᠳᠬᠢᠯ ᠳᠤ ᠲᠣᠳᠣ ᠵᠢᠷᠤᠭᠳᠠᠭᠠᠳ ᠶᠡᠷᠦ ᠪᠤᠰᠤ ᠶᠢᠨ ᠪᠠᠶᠠᠰᠬᠤᠯᠠᠩᠲᠤ ᠣᠷᠴᠢᠯᠠᠩ ᠲᠥᠰᠥᠭᠡᠯᠡᠭᠳᠡᠨ᠎ᠡ᠃ ᠭᠠᠯᠪᠠ ᠲᠣᠭᠲᠠᠬᠤ ᠶᠢᠨ ᠲᠡᠷᠡ ᠮᠥᠴᠡ ᠠᠴᠠ ᠪᠣᠷᠣᠭᠠᠨ ᠤ ᠡᠵᠡᠳ ᠰᠠᠬᠢᠭᠤᠰᠤ ᠶᠡᠷᠦ ᠠᠴᠠ ᠪᠠᠨ ᠠᠯᠠᠭ ᠰᠠᠨᠠᠭ᠎ᠠ ᠦᠭᠡᠢ ᠨᠢ ᠭᠡᠷᠡᠴᠢᠯᠡᠭᠳᠡᠵᠦ᠂  ᠶᠢᠷᠲᠢᠨᠴᠦ ᠶᠢᠨ ᠲᠡᠳᠡᠭᠡᠷ ᠪᠠᠲᠤᠲᠠᠢ ᠪᠣᠳᠠᠲᠠᠢ ᠦᠨᠡᠨ ᠤᠳ ᠪᠠ ᠳᠡᠯᠲᠡᠯᠢᠭ᠋ ᠪᠦᠲᠦᠴᠡ ᠶᠢᠨ ᠲᠤᠬᠠᠢ ᠦᠨᠡᠷᠬᠡᠯ ᠦᠭᠡᠢ ᠰᠢᠪᠡᠨᠡᠨ ᠰᠢᠪᠡᠷᠡᠭᠰᠡᠭᠡᠷ ᠢᠷᠡᠭᠰᠡᠨ ᠳᠤ ᠰᠦᠰᠦᠭᠯᠡᠨ ᠲᠠᠯᠠᠷᠬᠠᠨᠠᠮ᠃    ᠪᠣᠷᠣᠭᠠᠨ ᠪᠢᠳᠡᠨ ᠠᠴᠠ ᠢᠯᠭᠠᠭ᠎ᠠ ᠨᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠪᠣᠷᠣᠭᠠᠨ ᠳᠤ ᠥᠪᠡᠷ ᠤᠨ ᠭᠡᠯᠡ᠂ ᠦᠵᠡᠯ ᠰᠠᠨᠠᠭ᠎ᠠ᠂ ᠢᠲᠡᠭᠡᠯ ᠪᠢᠰᠢᠷᠡᠯ᠂ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ᠂ ᠠᠭᠠᠰᠢ ᠵᠠᠩ᠂ ᠵᠡᠭᠦᠳᠦ ᠵᠦᠩ  ᠪᠤᠢ ᠭᠡᠵᠢ ᠤᠤ⁈ ᠠᠯᠢᠪᠠ ᠪᠦᠭᠦᠨ ᠳᠤ ᠥᠪᠡᠷ ᠥᠪᠡᠷ ᠤᠨ ᠨᠢᠭᠤᠴᠠ ᠲᠠᠢ᠂ ᠭᠠᠭᠴᠠ ᠬᠦ ᠬᠥᠮᠥᠨ ᠪᠢᠳᠡ ᠥᠴᠥᠬᠡᠨ᠃ ᠬᠤᠷᠣᠬᠠᠢ ᠰᠢᠪᠠᠵᠢ ᠠᠴᠠ ᠪᠢᠳᠡ ᠶᠠᠭᠤ ᠪᠠᠷ ᠢᠶᠠᠨ ᠣᠨᠳᠣᠣ ᠭᠡᠵᠦ᠃ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠪᠡᠶ᠎ᠡ ᠪᠠᠨ  ᠠᠯᠢᠪᠠ ᠶᠢᠨ ᠳᠡᠭᠡᠲᠡᠢ ᠭᠡᠵᠦ ᠣᠷᠣᠢ ᠣᠩᠭᠤᠳ ᠦᠭᠡᠢ ᠶᠡᠬᠡᠷᠬᠡᠨ ᠲᠣᠭᠤᠭᠠᠳ ᠵᠠᠭᠤᠨ ᠵᠠᠭᠤᠨ ᠢ ᠬᠠᠷᠠᠯᠭᠠᠨ ᠦᠳᠡᠭᠰᠡᠨ ᠨᠢ ᠶᠠᠭᠤᠲᠠᠢ ᠥᠷᠥ ᠡᠪᠡᠳᠦᠮ᠎ᠡ᠂ ᠵᠢᠷᠦᠬᠡ ᠰᠢᠮᠰᠢᠷᠡᠮ᠎ᠡ᠃ ᠴᠣᠩᠬᠤᠨ ᠤ ᠳᠡᠷᠭᠡᠳᠡ ᠰᠠᠭᠤᠭᠠᠳ ᠢᠩᠭᠢᠵᠦ ᠪᠤᠳᠤᠬᠤᠶ᠎ᠠ ᠥᠷᠥᠭᠡᠨ ᠤ ᠬᠡᠷᠡᠮ ᠬᠠᠨ᠎ᠠ᠂ ᠰᠢᠷᠡᠭᠡ ᠰᠠᠨᠳᠠᠯᠢ᠂ ︽ᠣᠭᠲᠠᠷᠭᠤᠢ ᠶᠢᠨ ᠴᠠᠭᠠᠨ ᠭᠠᠷᠤᠳᠢ︾ ᠨᠣᠮ ᠤᠨ ᠳᠡᠯᠭᠡᠭᠡ ᠦᠭᠡᠢ ᠬᠠᠭᠤᠳᠠᠰᠤ᠂ ᠱᠠᠭᠠᠵᠠᠩ ᠴᠣᠮᠣ᠂ ᠡᠮ ᠤᠨ ᠲᠠᠯᠪᠢᠭᠤᠷ᠂ ᠬᠠᠷᠠᠭᠠᠨ ᠤ ᠬᠡᠮᠵᠢᠭᠦᠷ᠂ ᠲᠡᠷᠡ ᠪᠠᠶᠢᠲᠤᠭᠠᠢ ᠪᠤᠯᠤᠩ ᠳᠤ ᠲᠦᠰᠢᠭᠦᠯᠵᠦ ᠲᠠᠯᠪᠢᠭᠰᠠᠨ ᠱᠦᠭᠦᠷ ᠤᠨ ᠪᠠᠷᠢᠭᠤᠯ᠂ ᠪᠠᠷᠢᠭᠤᠯ ᠤᠨ ᠬᠠᠯᠴᠠᠷᠠᠭᠰᠠᠨ ᠰᠢᠷᠭᠠᠯᠬᠠᠨ ᠪᠤᠳᠤᠭ ᠭᠦᠷᠲᠡᠯ᠎ᠡ ᠪᠣᠷᠤᠭ᠎ᠠ ᠪᠣᠯᠣᠭᠠᠳ ᠱᠠᠭᠢᠵᠤ ᠪᠠᠶᠢᠬᠤ ᠰᠢᠭ᠋ ᠬᠠᠴᠢᠨ ᠰᠡᠷᠡᠯ ᠳᠤ ᠠᠪᠲᠠᠭᠳᠠᠨ᠎ᠠ᠃ᠣᠷᠴᠢᠯᠠᠩ ᠴᠠᠭᠯᠠᠰᠢ ᠦᠭᠡᠢ ᠠᠭᠤᠳᠠᠮ᠂ ᠭᠦᠪᠡᠭᠡ ᠬᠢᠵᠠᠭᠠᠷ ᠨᠢ ᠲᠡᠨᠳᠡ ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠮᠡᠳᠡᠮᠡᠬᠡᠶᠢᠷᠡᠬᠦ ᠳᠤ ᠦᠭᠡ ᠢᠴᠢᠨ᠎ᠡ᠃ ᠮᠥᠩᠬᠡ ᠡᠷᠭᠢᠯᠳᠦᠭᠴᠢ ᠠᠯᠲᠠᠨ ᠬᠤᠷᠯᠣ ᠰᠢᠭ᠋ ᠠᠯᠠᠭᠬᠠᠨ ᠳᠡᠯᠡᠬᠡᠢ ᠶᠢᠨ ᠠᠷᠢᠭᠤᠨ ᠬᠡᠪᠡᠯᠢ ᠳᠤ ᠬᠥᠮᠥᠨ ᠤ ᠲᠥᠷᠦᠯ ᠢ ᠣᠯᠣᠭᠰᠠᠨ ᠪᠢᠳᠡ ᠪᠣᠷᠣᠭᠠᠨ ᠤ ᠬᠢᠷᠢ ᠤᠬᠠᠭᠠᠨ ᠰᠠᠨᠠᠭ᠎ᠠ ᠭᠡᠭᠡᠬᠡᠨ ᠭᠡᠵᠦ ᠦᠦ ᠳ᠋ᠠ︖ ᠪᠦᠦ ᠮᠡᠳᠡ᠃ ᠣᠭᠤᠰᠣᠷ ᠪᠦᠴᠡ ᠦᠭᠡᠢ ᠤᠶᠤᠨ ᠪᠤᠳᠣᠯ ᠢᠶᠠᠷ ᠢᠶᠠᠨ ᠣᠷᠴᠢᠯᠠᠩ ᠪᠢᠳᠡᠨ ᠢ ᠡᠷᠬᠡᠰᠢᠶᠡᠵᠦ᠂ ᠵᠣᠨ ᠤ ᠴᠠᠭ ᠤᠨ ᠠᠯᠲᠠᠨ ᠦᠵᠦᠮ ᠬᠡᠮᠡᠨ ᠨᠡᠷᠡᠯᠡᠭᠳᠡᠭᠰᠡᠨ ᠷᠠᠰᠢᠶᠠᠨ ᠬᠤᠷ᠎ᠠ ᠪᠠᠨ ᠬᠠᠷᠠᠮᠨᠠᠯ ᠦᠭᠡᠢ ᠢᠯᠡᠭᠡᠭᠡᠳ ᠬᠠᠨᠤᠰᠢ ᠦᠭᠡᠢ ᠰᠢᠨᠤᠯ ᠳᠠᠭᠠᠨ ᠱᠥᠭᠯᠡᠭᠦᠯᠦᠭᠰᠡᠨ ᠠᠳᠬᠠᠭ ᠮᠠᠭᠤ ᠰᠡᠳᠬᠢᠯ ᠢ ᠮᠢᠨᠢ ᠠᠷᠢᠭᠤᠰᠬᠠᠨ ᠴᠡᠪᠡᠷᠯᠡᠨ᠎ᠡ ᠪᠢᠰᠢᠦ︖ ᠪᠣᠷᠣᠭᠠᠨ ᠤ ᠭᠠᠭᠴᠠᠬᠠᠨ ᠲᠣᠰᠣᠯ ᠳᠤ ᠴᠤ ᠶᠢᠷᠲᠢᠨᠴᠦ ᠶᠢᠨ ᠣᠷᠣᠨ ᠵᠠᠢ᠂ ᠴᠠᠭ ᠮᠥᠴᠡ᠂ ᠬᠦᠰᠡᠯ ᠮᠥᠷᠥᠭᠡᠳᠦᠯ᠂ ᠵᠢᠷᠭᠠᠯ ᠵᠤᠪᠠᠯᠠᠩ᠂ ᠦᠢᠯᠡ ᠦᠷ᠎ᠡ ᠶᠢᠨ ᠪᠠᠷᠢᠯᠳᠤᠯᠭ᠎ᠠ ᠣᠷᠣᠰᠢᠳᠠᠭ ᠪᠥᠭᠡᠳ ᠡᠨᠡ ᠪᠦᠭᠦᠨ ᠢ ᠪᠣᠷᠣᠭᠠᠨ ᠤ ᠲᠤᠰᠣᠯ ᠨᠢᠭᠡᠪᠦᠷᠢ ᠳᠣᠲᠣᠷ᠎ᠠ ᠪᠠᠨ ᠥᠷᠥᠪᠴᠢᠬᠡᠨ ᠲᠡᠭᠡᠭᠡᠵᠦ ᠶᠠᠪᠤᠬᠤ ᠳᠠᠭᠠᠨ ᠬᠡᠴᠢᠨᠡᠨ ᠶᠡᠭᠡ ᠶᠠᠳᠠᠷᠠᠵᠤ ᠵᠦᠳᠡᠷᠡᠵᠦ᠂ ᠡᠪᠡᠳᠴᠦ ᠰᠢᠨᠠᠯᠪᠠᠴᠤ ᠤᠬᠲᠣ ᠳᠤᠤᠭᠠᠷᠳᠠᠭ ᠦᠭᠡᠢ ᠪᠢᠯᠡ᠃     ᠠᠤᠭ᠎ᠠ ᠶᠡᠭᠡ ᠥᠴᠥᠬᠡᠨ ᠠᠴᠠ ᠡᠭᠦᠰᠦᠨ᠎ᠡ ᠭᠡᠳᠡᠭ ᠦᠭᠡ ᠪᠤᠢ᠃ ᠪᠤᠷᠬᠠᠯᠢᠭ ᠴᠡᠪᠡᠷᠬᠡᠨ ᠪᠣᠷᠣᠭᠠᠨ ᠤ ᠲᠤᠰᠣᠯ ᠤᠳ ᠪᠦᠲᠦᠨ ᠴᠣᠭᠴᠠ ᠳᠤ ᠬᠤᠷᠠᠮᠳᠤᠬᠤ ᠳᠠᠭᠠᠨ ᠵᠢᠭᠳᠡ ᠬᠥᠳᠡᠯᠭᠡᠭᠡᠨ ᠡᠭᠦᠰᠬᠡᠵᠦ᠂ ᠭᠠᠵᠠᠷ ᠤᠨ ᠮᠠᠩᠨᠠᠢ ᠤᠷᠤᠭᠤ ᠮᠢᠨᠳᠠᠰᠤᠨ ᠴᠠᠭᠠᠨ ᠮᠠᠨᠠᠨ ᠲᠠᠲᠠᠭᠤᠯᠤᠭᠰᠠᠭᠠᠷ ᠥᠯᠵᠡᠢ ᠤᠲᠠᠰᠤ ᠵᠢᠷᠤᠬᠤ ᠮᠡᠲᠦ ᠥᠯᠮᠡᠢ ᠪᠠᠨ ᠬᠥᠩᠭᠡᠬᠡᠨ ᠲᠠᠯᠪᠢᠬᠤ ᠨᠢ ᠴᠡᠴᠡᠭ ᠤᠨ ᠳᠤᠮᠳᠠ ᠢᠨᠵᠠᠭ᠎ᠠ ᠲᠣᠷᠮᠣᠯᠵᠠᠬᠤ ᠰᠢᠭ᠋  ᠬᠥᠭᠡᠷᠦᠬᠦᠨ᠂ ᠦᠨᠡᠲᠦ ᠰᠤᠳᠤᠷ ᠤᠨ ᠴᠠᠭᠠᠰᠤᠨ ᠳᠤ ᠰᠢᠳᠢᠲᠦ ᠪᠢᠷ ᠤᠨ ᠦᠵᠦᠭᠦᠷ ᠢ ᠬᠦᠷᠦᠯᠴᠡᠭᠦᠯᠦᠨ ᠵᠢᠷᠢᠯᠵᠡᠭᠦᠯᠵᠦ᠂ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠮᠥᠩᠬᠡ ᠶᠢᠨ ᠳᠠᠭᠤᠯᠠᠯ ᠮᠡᠨᠳᠦᠯᠡᠬᠦ ᠮᠡᠲᠦ ᠢᠳᠡᠷᠡᠭᠦᠨ᠃ ᠪᠠᠭ᠎ᠠ ᠳᠠᠭᠠᠨ ᠡᠶᠢᠮᠦ ᠪᠣᠷᠣᠭᠠᠨ ᠳᠤ ᠭᠡᠷ ᠲᠡᠭᠡᠨ ᠲᠣᠭᠲᠠᠨ᠎ᠠ ᠭᠡᠵᠦ ᠦᠭᠡᠢ᠂ ᠦᠶ᠎ᠡ ᠶᠢᠨ ᠬᠡᠳᠦᠭᠦᠯᠡ ᠪᠠᠨ ᠭᠠᠨᠵᠤᠭ᠎ᠠ ᠨᠡᠶᠢᠯᠡᠮᠡᠭᠴᠡ ᠮᠥᠭᠦ ᠲᠡᠭᠦᠬᠦ ᠪᠠᠷ ᠭᠠᠷᠤᠭᠠᠳ ᠱᠠᠯᠠᠪ ᠨᠣᠷᠴᠤ᠂ ᠰᠤᠮᠤ ᠶᠢᠨ ᠵᠡᠭᠦᠨᠳᠡᠬᠢ ᠴᠡᠯ ᠨᠣᠭᠤᠭᠠᠷᠠᠭᠰᠠᠨ ᠠᠭᠤᠯᠠᠰ ᠢ ᠰᠦᠯᠵᠢᠭᠰᠡᠭᠡᠷ ᠪᠠᠬ᠎ᠠ ᠪᠠᠨ ᠬᠠᠨᠤᠲᠠᠯ᠎ᠠ ᠨᠠᠭᠠᠳᠬᠤ ᠶᠢᠨ ᠵᠡᠷᠭᠡᠴᠡᠭᠡ ᠪᠥᠰ ᠪᠣᠭᠴᠣ ᠪᠠᠨ ᠲᠦᠨᠲᠦᠶᠢᠲᠡᠯ᠎ᠡ ᠣᠯᠵᠠ ᠣᠮᠤᠭ ᠲᠠᠢ ᠬᠠᠷᠢᠵᠤ ᠢᠷᠡᠵᠡᠭᠡᠳᠡᠭ᠃ ᠶᠡᠬᠡᠴᠦᠦᠯ ᠠᠭᠤᠷᠯᠠᠭᠰᠠᠨ ᠳᠦᠷᠢ ᠦᠵᠡᠭᠦᠯᠦᠭᠡᠳ ᠪᠣᠷᠣᠭᠠᠨ ᠳᠤ ᠵᠤᠷᠠᠮ᠎ᠠ ᠰᠢᠭ᠋ ᠱᠣᠯᠪᠣᠶᠢᠭᠰᠠᠨ ᠢ ᠮᠢᠨᠢ ᠢᠨᠢᠶᠡᠳᠦ ᠪᠠᠷ ᠢᠶᠠᠨ ᠰᠦᠯᠡᠭᠡᠳ ᠥᠩᠭᠡᠷᠡᠭᠦᠯᠳᠡᠭ ᠰᠠᠨ᠃     ᠪᠣᠷᠣᠭᠠᠨ ᠤ ᠪᠤᠮᠠᠨ ᠲᠤᠰᠣᠯ ᠭᠢᠯᠪᠠᠭᠠᠨᠠᠨ ᠡᠷᠭᠢᠯᠳᠦᠭᠰᠡᠭᠡᠷ ᠭᠠᠵᠠᠷ ᠲᠡᠭᠷᠢ ᠶᠢᠨ ᠮᠠᠨᠠᠨᠲᠤ ᠰᠠᠪᠰᠠᠯᠭᠠᠨ ᠳᠤᠮᠳᠠ ᠨᠠᠶᠢᠷᠠᠯ ᠬᠥᠭᠵᠢᠮ ᠤᠳᠤᠷᠢᠳᠬᠤ ᠨᠢ ᠦᠷ᠎ᠡ ᠤᠳᠤᠮ ᠪᠢᠳᠡᠨ ᠳᠡᠭᠡᠨ ᠲᠡᠭᠷᠢ᠂ ᠭᠠᠵᠠᠷ᠂ ᠬᠥᠮᠥᠨ ᠭᠤᠷᠪᠠ ᠶᠢᠨ ᠤᠷᠭᠢᠵᠦ ᠪᠣᠯᠣᠰᠢ ᠦᠭᠡᠢ ᠰᠢᠳᠦᠯᠴᠡᠭᠡᠨ ᠤ ᠲᠤᠬᠠᠢ ᠠᠮᠢᠨᠴᠢᠯᠠᠨ ᠵᠠᠬᠢᠭᠰᠠᠨ ᠡᠴᠢᠭᠡ ᠡᠪᠦᠭᠡᠳ ᠤᠨ ᠮᠢᠨᠢ ᠭᠦᠨ ᠤᠬᠠᠭᠠᠨᠴᠢ ᠰᠤᠷᠭᠠᠯ ᠵᠠᠬᠢᠶ᠎ᠠ ᠶᠢ ᠰᠠᠨᠠᠭᠳᠠᠭᠤᠯᠤᠨ᠎ᠠ᠃ ᠨᠡᠭᠦᠬᠦ ᠪᠦᠷᠢ ᠪᠠᠭᠤᠴᠠᠨ ᠳᠡᠭᠡᠷ᠎ᠡ ᠪᠠᠨ ᠬᠢᠮᠤᠰᠤᠨ ᠴᠢᠨᠡᠭᠡᠨ ᠬᠤᠭ ᠦᠯᠡᠳᠡᠭᠡᠯ ᠦᠭᠡᠢ ᠠᠴᠢᠶᠠᠯᠠᠵᠤ᠂ ᠬᠠᠩᠭᠠᠢ ᠭᠤᠪᠢ ᠶᠢᠨ ᠢᠶᠠᠨ ᠪᠤᠶᠠᠨ ᠢᠶᠠᠷ ᠳᠦᠷᠪᠡᠨ ᠴᠠᠭ ᠤᠨ ᠡᠭᠡᠯᠵᠢᠨ ᠳᠤ ᠡᠯᠪᠡᠭ ᠬᠠᠩᠬᠤᠯᠤᠭᠤᠨ ᠠᠮᠢᠳᠤᠷᠠᠯ᠎ᠠ ᠬᠡᠮᠡᠨ ᠪᠡᠯᠭᠡᠰᠢᠶᠡᠨ ᠳᠠᠭᠠᠳᠬᠠᠵᠤ᠂ ︽ᠠᠯᠢ ᠨᠢᠭᠡ ᠠᠮᠢᠲᠠᠨ ᠭᠤᠣᠯᠲᠠᠨ ᠨᠢ ᠪᠦᠳᠦᠷᠢᠭᠡᠳ ᠬᠥᠯ ᠢᠶᠠᠨ ᠰᠡᠪᠲᠦᠭᠡᠴᠢᠭᠡᠭᠦ ᠪᠤᠢ︾ ᠭᠡᠵᠦ ᠡᠨᠡᠷᠢᠬᠦ ᠳᠡᠭᠡᠨ ᠤᠶᠠᠭᠠᠨ ᠤ ᠨᠦᠬᠡ ᠪᠠᠨ ᠭᠦᠷᠲᠡᠯ᠎ᠡ ᠤᠨᠠᠭᠠᠨ ᠰᠢᠷᠣᠢ ᠪᠠᠷ ᠨᠢ ᠮᠠᠷᠲᠠᠯ ᠦᠭᠡᠢ ᠴᠢᠭᠵᠢᠳᠡᠭ ᠮᠥᠩᠬᠡ ᠶᠢᠨ ᠠᠷᠠᠨᠰᠢᠨ ᠢ ᠪᠤᠳᠤᠬᠳᠠᠭᠤᠯᠤᠨ᠎ᠠ᠃ ᠣᠨ ᠵᠢᠯ ᠤᠳ ᠡᠷᠭᠢᠰᠢ ᠦᠭᠡᠢ ᠤᠯᠠᠷᠢᠨ ᠣᠳᠴᠠᠢ᠃ ᠭᠠᠭᠴᠠ ᠬᠦ ᠠᠶᠠᠷᠬᠠᠨ ᠰᠡᠩᠰᠡᠷᠡᠬᠦ ᠡᠨᠡ ᠵᠥᠭᠡᠯᠡᠨ ᠪᠣᠷᠣᠭᠠᠨ ᠡᠮᠵᠡᠭᠬᠡᠨ ᠵᠢᠷᠦᠬᠡ ᠶᠢ ᠠᠨᠠᠭᠠᠨ᠎ᠠ᠃ ᠲᠡᠮᠦᠷᠯᠢᠭ ᠳᠠᠭᠤ ᠱᠤᠤᠭᠢᠶᠠᠨ ᠬᠢᠭᠡᠳ ᠬᠡᠷᠡᠭ ᠦᠭᠡᠢ ᠮᠠᠭᠤ ᠠᠲᠠᠭ᠎ᠠ ᠵᠢᠲᠥᠭᠡ᠂ ᠬᠡᠷᠡᠭᠦᠯ ᠲᠡᠮᠡᠴᠡᠯ ᠤᠨ ᠴᠢᠪᠢᠯᠲᠦ ᠮᠥᠷ ᠢ ᠦᠵᠡᠭᠳᠡᠬᠦ ᠪᠠᠷ᠎ᠠ ᠦᠭᠡᠢ ᠪᠤᠯᠲᠠᠯ᠎ᠠ ᠬᠤᠷᠢᠶᠠᠨ ᠳᠤᠭᠲᠤᠷᠤᠭᠠᠳ ᠪᠣᠷᠣᠭᠠᠨ ᠤ ᠡᠨᠡ ᠱᠠᠭᠢᠬᠤ ᠴᠢᠮᠡᠭᠡ ᠯᠡ ᠶᠢᠷᠲᠢᠨᠴᠦ ᠳᠡᠯᠡᠬᠡᠢ ᠶᠢ ᠡᠵᠡᠮᠰᠢᠨ᠎ᠡ᠃     ᠪᠣᠷᠣᠭᠠᠨ ᠤ ᠥᠩᠭᠡ ᠴᠡᠴᠡᠭᠡᠰ ᠤᠨ ᠥᠩᠭᠡ ᠯᠦᠭᠡ ᠠᠳᠠᠯᠢᠬᠠᠨ ᠪᠠᠶᠢᠬ᠎ᠠ ᠳ᠋ᠠ ᠭᠡᠵᠦ ᠬᠡᠨ ᠳᠤ ᠴᠤ ᠬᠡᠯᠡᠬᠦ ᠦᠭᠡᠢ ᠪᠠᠷ ᠳᠣᠲᠣᠷ᠎ᠠ ᠪᠠᠨ ᠪᠤᠳᠤᠨ᠎ᠠ᠃ ᠬᠠᠮᠤᠭ ᠤᠨ ᠲᠦᠷᠦᠭᠦᠨ ᠳᠤ ᠲᠡᠭᠷᠢ ᠶᠢᠨ ᠴᠡᠩᠬᠡᠷ ᠥᠩᠭᠡ ᠲᠠᠢ ᠢᠵᠢᠯᠬᠡᠨ ᠪᠠᠶᠢᠬᠤ ᠨᠢ ᠭᠡᠵᠦ ᠬᠡᠦᠬᠡᠳ ᠰᠢᠭ ᠭᠡᠨᠡᠨ ᠴᠠᠶᠢᠯᠭᠠᠨ ᠢᠶᠠᠷ ᠰᠠᠨᠠᠨ᠎ᠠ᠃ ᠵᠠᠯᠭᠠᠭᠠᠳ ᠶᠠᠭᠠᠨ᠂ ᠤᠯᠠᠭᠠᠨ᠂ ᠬᠤᠨᠳᠠᠨ᠂ ᠰᠢᠷ᠎ᠠ᠂ ᠨᠣᠭᠤᠭᠠᠨ ᠁ ᠭᠡᠳ ᠴᠠᠭᠠᠰᠢ ᠭᠦᠪᠦᠷᠡᠭᠦ ᠨᠢ ᠯᠠᠪᠲᠠᠢ᠃ ᠠᠪᠤᠷᠠᠯ ᠡᠨᠡᠷᠢᠯ᠂ ᠳᠤᠷᠠᠯᠠᠯ ᠬᠠᠶᠢᠷ᠎ᠠ᠂ ᠳᠤᠷᠠᠰᠤᠯ ᠮᠥᠷᠥᠭᠡᠳᠦᠯ᠂ ᠢᠲᠡᠭᠡᠯ ᠨᠠᠶᠢᠳᠠᠪᠤᠷᠢ᠂ ᠴᠢᠩ ᠵᠢᠳᠬᠦᠯ ᠪᠦᠭᠦᠨ ᠢ ᠡᠩᠬᠦᠷᠡᠶᠢᠯᠡᠨ ᠲᠡᠪᠡᠷᠢᠵᠦ᠂ ᠤᠯᠠᠮ ᠲᠣᠪ ᠲᠤᠩᠭᠠᠯᠠᠭ ᠪᠣᠯᠭᠠᠳᠠᠭ ᠷᠢᠳᠢ ᠰᠢᠳᠢ ᠲᠠᠢ ᠤᠴᠢᠷ ᠠᠴᠠ ᠪᠣᠷᠣᠭᠠᠨ ᠤ ᠲᠤᠬᠠᠢ ᠲᠥᠰᠥᠭᠡᠯᠡᠯ ᠤᠶᠢᠳᠤᠰᠢ ᠦᠭᠡᠢ᠂ ᠤᠶᠢᠳᠤᠰᠢ ᠦᠭᠡᠢ ᠲᠤᠯᠠ ᠲᠡᠭᠦᠰᠬᠡᠯ ᠭᠡᠵᠦ ᠦᠭᠡᠢ᠃ ᠪᠣᠷᠣᠭᠠᠨ ᠠᠯᠭᠤᠷᠬᠠᠨ ᠵᠤᠬᠰᠣᠬᠤ ᠪᠠᠷ ᠰᠠᠶᠢᠲᠤᠷ ᠤᠮᠳᠠᠯᠠᠭᠳᠠᠭᠰᠠᠨ ᠡᠪᠡᠰᠦ ᠴᠡᠴᠡᠭᠡᠰ᠂ ᠭᠠᠳᠠᠨ᠎ᠠ ᠪᠠᠨ ᠨᠠᠮ ᠬᠥᠮ ᠴᠤ ᠳᠣᠲᠣᠷ᠎ᠠ ᠪᠠᠨ ᠡᠭᠡᠰᠢᠭᠯᠡᠩᠲᠦ ᠠᠭᠤᠯᠠ ᠲᠣᠯᠣᠭᠠᠳ ᠤᠨ ᠡᠩᠭᠡᠷ ᠡᠭᠦᠯᠡᠨ ᠳᠠᠯᠳᠠ ᠠᠴᠠ ᠨᠠᠷᠠ ᠭᠠᠷᠬᠤ ᠲᠡᠷᠡ ᠭᠱᠠᠨ ᠢ ᠬᠦᠯᠢᠶᠡᠨ᠎ᠡ᠃ ᠲᠦᠭᠡᠮᠡᠯ ᠢᠪᠡᠭᠡᠯᠲᠦ ᠭᠡᠷᠡᠯ ᠤᠨ ᠲᠣᠭᠤᠷᠢᠭ ᠲᠤᠨᠢ ᠢᠪᠡᠭᠡᠭᠳᠡᠨ ᠪᠠᠶᠠᠰᠤᠭᠠᠳ ᠵᠥᠭᠡᠯᠡᠨ ᠵᠥᠭᠡᠯᠡᠨ ᠲᠡᠯᠪᠢᠭᠡ ᠪᠠᠨ ᠪᠦᠯᠢᠶᠡᠰᠲᠡᠯ᠎ᠡ ᠡᠭᠡᠭᠡᠬᠦ ᠲᠡᠷᠡ ᠴᠠᠭ ᠢ ᠡᠪᠡᠰᠦ ᠴᠡᠴᠡᠭᠡᠰ ᠬᠡᠨ ᠠᠴᠠ ᠴᠤ ᠢᠯᠡᠭᠦᠦ ᠬᠦᠯᠢᠶᠡᠨ᠎ᠡ᠃     ᠳᠠᠪᠬᠤᠷ ᠳᠠᠪᠬᠤᠷ ᠬᠠᠷ᠎ᠠ ᠡᠭᠦᠯᠡᠰ ᠨᠢᠮᠭᠡᠷᠡᠨ ᠰᠠᠷᠨᠢᠭᠰᠠᠭᠠᠷ ᠬᠡᠰᠡᠭ ᠬᠡᠰᠡᠭ ᠢᠶᠠᠷ ᠰᠡᠭᠦᠳᠡᠷ ᠢᠶᠠᠨ ᠳᠠᠭᠠᠭᠤᠯᠤᠭᠠᠳ ᠡᠪᠬᠡᠷᠡᠯᠳᠦᠨ ᠤᠳᠬᠤ ᠶᠢᠨ ᠲᠡᠷᠡ ᠴᠠᠭ ᠲᠤᠷ ᠪᠣᠷᠣᠭᠠᠨ ᠳᠤ ᠤᠬᠢᠶᠠᠭᠳᠠᠭᠰᠠᠨ ᠡᠪᠡᠰᠦ ᠴᠡᠴᠡᠭᠡᠰ᠂ ᠠᠭᠤᠯᠠ ᠲᠣᠯᠣᠭᠠᠳ ᠤᠨ ᠥᠩᠭᠡ ᠨᠡᠩ ᠰᠢᠨᠡᠳᠦᠭᠡᠳ ︽ᠪᠢᠳᠡ ᠤᠤᠯ ᠨᠢ ᠡᠶᠢᠮᠦ︾ ᠭᠡᠰᠡᠨ ᠢᠶᠠᠨ ᠪᠠᠲᠤᠯᠠᠬᠤ ᠰᠢᠭ᠋ ᠭᠡᠷᠡᠯᠳᠦᠨ ᠮᠦᠰᠢᠶᠡᠨ᠎ᠡ᠃ ᠶᠠᠭ ᠡᠨᠡ ᠦᠶ᠎ᠡ ᠳᠤ ᠡᠭᠦᠯᠡᠨ ᠴᠠᠭᠠᠨ᠎ᠠ ᠠᠴᠠ ᠨᠠᠷᠠ ᠪᠣᠯᠵᠤᠭ᠎ᠠ ᠲᠠᠢ ᠶᠤᠮᠰᠢᠭ ᠮᠠᠯᠳᠡᠰᠭᠢᠨ ᠭᠠᠷᠴᠤ ᠢᠷᠡᠭᠡᠳ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠲᠠᠷᠨᠢᠯᠢᠭ ᠦᠭᠡᠰ ᠬᠡᠯᠬᠢᠭᠰᠡᠭᠡᠷ ᠨᠢᠭᠦᠯᠡᠰᠦᠩᠭᠦᠢ ᠶᠢᠨ ᠠᠯᠲᠠᠨ ᠰᠠᠴᠤᠷᠠᠭ ᠨᠢ ᠽᠠᠮᠪᠤᠲᠢᠪ ᠢ ᠭᠡᠶᠢᠭᠦᠯᠬᠦ ᠳᠤ ᠴᠡᠭᠡᠵᠢᠨ ᠳᠤᠮᠳᠠᠭᠤᠷ ᠡᠶᠡᠯᠰᠡᠭ ᠬᠠᠶᠢᠷ᠎ᠠ ᠶᠢᠨ ᠨᠢᠭᠡᠨ ᠳᠠᠭᠤᠤ ᠤᠴᠢᠷᠯᠠᠨ ᠤᠷᠤᠰᠴᠤ᠂ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠨᠣᠭᠤᠭᠠᠷᠠᠨ ᠴᠡᠯᠡᠶᠢᠭᠡᠳ ᠰᠠᠪ ᠰᠠᠷᠠᠭᠤᠯᠬᠠᠨ᠃ ᠥᠯᠦ ᠮᠡᠳᠡᠭᠬᠡᠨ ᠰᠡᠷᠢᠭᠦᠨ ᠰᠢᠪᠰᠢᠶ᠎ᠡ ᠰᠡᠪᠢᠯᠵᠡᠬᠦᠶ᠎ᠡ ᠴᠡᠴᠡᠭᠡᠰ ᠳᠣᠬᠢᠯᠵᠠᠮᠤ᠃ 
  
ᠢᠷᠡᠯᠲᠡ᠄ ᠲᠤᠮᠳᠠᠳᠤ ᠤᠯᠤᠰ ᠤᠨ ᠮᠣᠩᠭᠤᠯ ᠬᠡᠯᠡᠨ ᠤ ᠰᠣᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备13001758号-1号