| ᠴᠠᠰᠤ᠂ ᠡᠪᠦᠯ ᠢ ᠮᠡᠳᠡᠭᠡᠯᠡᠭᠰᠡᠨ ᠴᠠᠭ ᠤᠨ ᠰᠢᠪᠠᠭᠤ᠃ ᠴᠠᠶᠢᠷᠠᠵᠤ ᠪᠠᠭᠤᠬᠤ ᠴᠡᠩᠬᠡᠷ ᠲᠡᠭᠷᠢ ᠶᠢᠨ ᠭᠠᠵᠠᠷ ᠲᠠᠭᠠᠨ | ᠰᠢᠪᠡᠨᠡᠭᠰᠡᠨ ᠬᠠᠶᠢᠷᠠ ᠶᠢᠨ ᠵᠠᠬᠢᠶᠠ᠂ ᠬᠤᠩᠭᠤᠷ ᠤᠨ ᠮᠢᠨᠢ ᠥᠭᠡᠳᠡ ᠠᠴᠠ ᠮᠦᠰᠢᠶᠡᠭᠰᠡᠨ ᠭᠠᠯᠪᠢᠷ ᠲᠥᠷᠬᠦ᠃ | ᠴᠠᠰᠤ᠂ ᠨᠢᠴᠦᠭᠦᠨ ᠮᠣᠳᠣᠳ ᠤᠨ ᠤᠶᠢᠳᠬᠠᠷ ᠢ ᠠᠷᠭᠠᠳᠠᠨ ᠨᠠᠪᠴᠢ ᠶᠢ ᠨᠢ ᠣᠷᠣᠯᠠᠨ ᠳᠡᠯᠭᠡᠷᠡᠵᠦ᠂ | ᠬᠥᠷᠥᠰᠥᠨ ᠳᠤ ᠬᠤᠷᠠᠵᠤ ᠬᠥᠬᠡ ᠡᠪᠡᠰᠦᠨ ᠤ ᠦᠨᠳᠦᠰᠦ ᠶᠢ ᠪᠦᠪᠡᠶᠢᠯᠡᠨ ᠬᠥᠬᠡᠮᠳᠦᠭ ᠠᠭᠤᠯᠠᠰ ᠤᠨ ᠰᠦᠷ ᠭᠡᠷᠡᠯ ᠢ | ᠨᠡᠮᠡᠳᠡᠭ᠃ | ᠴᠠᠰᠤ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠰᠢᠯᠦᠭ ᠤᠨ ᠬᠢᠨᠢ ᠣᠩᠭᠤᠳ ᠪᠣᠯᠵᠤ ᠤᠢ ᠰᠡᠷᠡᠯ ᠳᠤᠨᠢ ᠴᠠᠭᠢᠯᠣᠨ | ᠪᠠᠭᠤᠳᠠᠭ᠃ | ᠨᠡᠭᠦᠳᠡᠯ ᠤᠨ ᠭᠠᠯᠠᠭᠤᠳ ᠨᠠᠭᠤᠷ ᠢᠶᠠᠨ ᠴᠠᠯᠭᠢᠯᠠᠲᠠᠯᠠ ᠨᠤᠷᠭᠢᠯᠳᠤᠨ ᠪᠠᠭᠤᠬᠤ ᠰᠢᠭ᠋ ᠴᠠᠰᠤ ᠯᠠᠪᠰᠠᠯᠠᠵᠤ ᠡᠬᠡ | ᠪᠠᠶᠢᠭᠠᠯᠢ ᠶᠢᠨ ᠢᠶᠠᠨ ᠡᠯᠢᠭᠡᠨ ᠳᠤ ᠡᠷᠬᠡᠯᠡᠨ ᠰᠠᠭᠠᠲᠠᠬᠤ ᠨᠢ ᠡᠵᠢ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠠᠷ ᠲᠡᠮᠡᠦᠯᠦᠭᠰᠡᠨ ᠦᠷᠡ | ᠶᠢᠨ ᠬᠢᠨᠢ ᠡᠯᠪᠡᠷᠢᠯ ᠤᠨ ᠰᠡᠳᠬᠢᠯ ᠮᠡᠲᠦ᠂ ᠨᠤᠲᠤᠭ ᠵᠦᠭ ᠢᠶᠠᠨ ᠭᠦᠶᠦᠯᠳᠦᠭᠰᠡᠨ ᠭᠤᠪᠢ ᠶᠢᠨ ᠴᠡᠩᠬᠡᠷ | ᠴᠢᠯᠠᠭᠤᠳ ᠤᠨ ᠵᠡᠭᠦᠳᠦᠨ ᠮᠡᠲᠦ᠃ | ᠴᠠᠰᠤᠨ ᠠᠴᠠ ᠰᠦᠨ ᠭᠡᠷᠡᠯ ᠰᠠᠴᠤᠷᠠᠨᠠ᠂ ᠴᠠᠰᠤᠨ ᠠᠴᠠ ᠨᠠᠷᠠᠨ ᠤ ᠢᠯᠴᠢ ᠪᠠᠳᠠᠷᠠᠨᠠ᠃ ᠬᠡᠭᠡᠷᠡ ᠶᠢᠨ ᠲᠠᠤᠯᠠᠢ | ᠬᠤᠷᠠᠭᠰᠠᠨ ᠴᠠᠰᠤᠨ ᠤ ᠨᠥᠮᠥᠷᠢ ᠳᠤ ᠨᠢᠳᠦ ᠪᠠᠨ ᠠᠨᠢᠭᠠᠳ ᠬᠠᠯᠠᠭᠤᠬᠠᠨ ᠨᠣᠶᠢᠷᠰᠤᠬᠤ ᠳᠤ ᠮᠥᠰᠥ ᠴᠠᠰᠤᠨ ᠳᠤ | ᠬᠤᠴᠢᠭᠳᠠᠭᠰᠠᠨ ᠨᠠᠭᠤᠷ ᠤᠨ ᠵᠢᠭᠠᠰᠤ ᠡᠶᠢᠰᠢ ᠲᠡᠶᠢᠰᠢ ᠰᠦᠯᠵᠢᠯᠳᠦᠨ ᠳᠠᠩᠳᠠ ᠡᠷᠬᠡ ᠴᠢᠯᠦᠭᠡᠲᠡᠢ᠃ ᠰᠠᠷᠠᠪᠴᠢᠨ ᠳᠤ | ᠡᠭᠦᠷᠯᠡᠭᠰᠡᠨ ᠪᠣᠯᠵᠣᠮᠣᠷ ᠢᠳᠡᠰᠢ ᠡᠷᠢᠵᠦ ᠬᠤᠷᠠᠭᠰᠠᠨ ᠴᠠᠰᠤᠨ ᠳᠡᠭᠡᠷᠡ ᠨᠢᠰᠦᠨ ᠪᠠᠭᠤᠬᠤ ᠳᠤ ᠠᠯᠬᠤᠭᠰᠠᠨ ᠮᠥᠷ | ᠨᠢ ᠲᠡᠷᠡ ᠬᠡᠪ ᠢᠶᠠᠷ ᠢᠶᠠᠨ ᠳᠤᠷᠠᠶᠢᠭᠠᠳ ᠤᠷᠠᠨ ᠵᠢᠷᠤᠭ ᠭᠡᠮᠡᠷ ᠥᠰᠪᠦᠷᠢ ᠶᠢᠨ ᠬᠡᠦᠬᠡᠳ ᠤᠨ ᠠᠩᠬᠠᠷᠤᠯ ᠢ ᠲᠠᠲᠠᠵᠤ | ᠤᠷᠮᠠ ᠶᠢ ᠬᠥᠭᠵᠢᠭᠡᠨᠡ᠃ ᠬᠡᠦᠬᠡᠳ ᠭᠡᠷ ᠠᠴᠠ ᠪᠠᠨ ᠭᠠᠷᠴᠤ ᠴᠠᠰᠤᠨ ᠬᠥᠮᠥᠨ ᠪᠠᠷᠢᠵᠤ ᠪᠣᠰᠬᠠᠬᠤ ᠳᠠᠭᠠᠨ | ᠠᠮᠢᠳᠤᠷᠠᠯ ᠤᠨ ᠭᠤᠸᠠ ᠰᠠᠶᠢᠬᠠᠨ ᠤ ᠨᠢᠭᠡᠨ ᠶᠢᠷᠲᠢᠨᠴᠦ ᠶᠢ ᠡᠭᠦᠳᠦᠨ ᠪᠦᠲᠦᠭᠡᠭᠰᠡᠨ ᠰᠢᠭ ᠪᠠᠶᠠᠰᠤᠨ ᠳᠡᠪᠬᠡᠷᠦᠨᠡ᠃ | ᠲᠠᠶᠢᠮᠦ ᠠ᠋᠂ ᠬᠥᠳᠡᠭᠡ ᠶᠢᠨ ᠬᠡᠦᠬᠡᠳ ᠤᠨ ᠰᠢᠨᠡ ᠶᠢ ᠡᠭᠦᠳᠦᠨ ᠪᠦᠲᠦᠭᠡᠬᠦ᠂ ᠵᠢᠷᠤᠵᠤ ᠲᠥᠰᠥᠪᠯᠡᠬᠦ ᠤᠷᠠᠨ ᠮᠡᠷᠭᠡᠵᠢᠯ | ᠰᠠᠨᠠᠮᠰᠠᠷ ᠦᠭᠡᠢ ᠢᠩᠭᠢᠵᠦ ᠯᠡ ᠡᠬᠢᠯᠡᠳᠡᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠬᠡᠨ ᠠᠯᠢᠨ ᠢᠶᠠᠨ ᠬᠠᠪᠰᠤᠷᠴᠤ ᠳᠡᠮᠵᠢᠬᠦ ᠳᠤ | ᠦᠢᠯᠡᠰ ᠨᠢ ᠪᠠᠳᠠᠷᠠᠬᠤ ᠶᠣᠰᠣ ᠤᠴᠢᠷ ᠢ ᠠᠩᠬᠠ ᠠᠯᠬᠤᠮ ᠲᠠᠨᠢᠳᠠᠭ ᠠᠵᠢ᠃ | ᠪᠠᠭᠠ ᠳᠠᠭᠠᠨ ᠪᠢ ᠳᠠᠩᠳᠠ ᠴᠠᠰᠤᠨ ᠬᠥᠮᠥᠨ ᠱᠤᠭᠤᠵᠤ ᠪᠦᠲᠦᠭᠡᠬᠦ ᠳᠤᠷᠠᠲᠠᠢ ᠬᠡᠦᠬᠡᠳ ᠪᠠᠶᠢᠭᠰᠠᠨ ᠶᠤᠮ᠃ | ᠴᠠᠰᠤ ᠣᠷᠣᠬᠤ ᠪᠣᠯᠭᠠᠨ ᠬᠥᠷᠰᠢ ᠶᠢᠨ ᠬᠡᠳᠦᠨ ᠨᠠᠶᠢᠵᠠ ᠪᠠᠨ ᠳᠠᠭᠤᠳᠠᠵᠤ ᠬᠠᠰᠢᠶᠠ ᠬᠦᠷᠢᠶᠡᠨ ᠤ ᠴᠠᠰᠤ ᠶᠢ | ᠣᠪᠣᠭᠠᠯᠠᠵᠤ ᠴᠠᠰᠤᠨ ᠬᠥᠮᠥᠨ ᠪᠠᠷᠢᠵᠤ ᠪᠦᠲᠦᠭᠡᠬᠦ ᠨᠢ ᠨᠢᠭᠡᠨ ᠶᠣᠰᠣᠨ ᠤ ᠵᠢᠷᠭᠠᠯ ᠪᠠᠶᠢᠪᠠ᠃ ᠴᠠᠰᠤᠨ | ᠬᠥᠮᠥᠨ ᠤ ᠪᠠᠨ ᠳᠦᠷᠢ ᠲᠥᠷᠬᠦ᠂ ᠵᠢᠰᠦ ᠥᠩᠭᠡ ᠶᠢ ᠭᠦᠷᠳᠡᠯᠡ ᠠᠳᠠᠯᠢᠳᠬᠠᠨ ᠥᠪᠡᠷ ᠥᠪᠡᠷ ᠤᠨ ᠢᠶᠠᠨ | ᠳᠠᠪᠠᠭᠤᠯᠢᠭ ᠢ ᠮᠠᠭᠲᠠᠨ ᠶᠠᠷᠢᠭᠠᠳ ᠬᠡᠨ ᠠᠯᠢᠨ ᠢᠶᠠᠨ ᠪᠢᠰᠢᠷᠡᠬᠦ ᠦᠭᠡᠢ ᠮᠥᠴᠡᠭᠡᠷᠬᠡᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠤᠳᠤ | ᠪᠤᠳᠤᠬᠤ ᠳᠤ ᠢᠨᠢᠶᠡᠳᠦ ᠭᠦᠷᠦᠮᠡᠷ᠃ ᠶᠠᠩᠵᠤ ᠶᠢᠨ ᠳᠦᠷᠰᠦ ᠲᠠᠢ ᠴᠠᠰᠤᠨ ᠬᠥᠮᠥᠨ ᠢᠶᠠᠨ ᠬᠠᠷᠠᠭᠠᠳ ᠪᠢᠳᠡ | ᠬᠡᠳᠦᠭᠦᠯᠡ ᠬᠤᠶᠢᠭᠤᠷ ᠤᠷᠢᠳᠠᠭᠤᠷ ᠨᠢ ᠡᠷᠭᠢᠴᠡᠭᠡᠳ ᠰᠠᠯᠵᠤ ᠶᠠᠳᠠᠳᠠᠭ ᠢ ᠪᠤᠤ ᠭᠡᠯᠡ᠂ ᠬᠥᠭᠡᠷᠴᠦ ᠳᠠᠭᠤᠯᠠᠭᠠᠳ | ᠬᠥᠭᠵᠢᠶᠡᠨ ᠨᠠᠷᠭᠢᠶᠠᠨ ᠪᠢᠯᠬᠠᠭᠤᠯᠤᠨᠠ᠃ | ᠲᠡᠷᠡ ᠦᠶᠡ ᠳᠤ᠂ ᠡᠮᠡᠭᠡ ᠮᠢᠨᠢ ᠲᠠᠶᠠᠭ ᠢᠶᠠᠨ ᠲᠤᠯᠵᠤ ᠪᠢᠳᠡ ᠬᠡᠳᠦᠭᠦᠯᠡ ᠶᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠴᠠᠰᠤᠨ | ᠬᠥᠮᠥᠨ ᠢ ᠤᠳᠠᠲᠠᠯᠠ ᠰᠢᠨᠵᠢᠵᠦ ᠪᠠᠶᠢᠴᠠᠭᠠᠭᠰᠠᠨ ᠢᠶᠠᠨ᠄ ︽ᠮᠢᠨᠤ ᠮᠠᠭᠤ ᠰᠢᠷᠠ ᠶᠢᠨ ᠪᠣᠰᠬᠠᠭᠰᠠᠨ ᠴᠠᠰᠤᠨ ᠬᠥᠮᠥᠨ | ᠨᠡᠯᠢᠶᠡᠳ ᠳᠡᠭᠵᠢᠨ ᠴᠣᠪᠣᠭᠤᠯᠢᠭ ᠬᠠᠷᠠᠭᠳᠠᠭᠰᠠᠨ ᠴᠦ ᠲᠠᠭᠠᠷᠠᠬᠤ ᠪᠠᠷ ᠤᠭᠢᠯᠠᠬᠤ ᠨᠢ ᠠᠶᠢᠯᠤᠤ ᠠᠶᠢᠯᠤᠤ︕︾ ᠭᠡᠵᠦ | ᠳᠣᠯᠣᠪᠤᠷ ᠬᠤᠷᠤᠭᠤ ᠪᠠᠷ ᠢᠶᠠᠨ ᠬᠠᠴᠠᠷ ᠢᠶᠠᠨ ᠬᠥᠩᠭᠡᠬᠡᠨ ᠳᠣᠶ᠋ᠢᠭᠠᠳ ᠴᠢᠨᠠᠭᠰᠢ ᠮᠠᠶᠢᠵᠢᠬᠴᠢᠨ ᠠᠯᠬᠤᠵᠤ᠂ ᠵᠡᠭᠦᠨ | ᠭᠡᠷ ᠤᠨ ᠲᠡᠮᠦᠷᠯᠤᠤ ᠶᠢᠨ ᠳᠡᠷᠭᠡᠳᠡ ᠬᠦᠷᠴᠦ ︽ᠨᠢᠳᠦ ᠦᠭᠡᠢ ᠬᠥᠮᠥᠨ ᠪᠠᠶᠢᠳᠠᠭ ᠶᠤᠮ ᠤᠤ︖ ᠰᠣᠷᠮᠤᠤᠰᠤ ᠶᠢ ᠨᠢ | ᠡᠪᠡᠰᠦ ᠪᠠᠷ ᠣᠷᠣᠯᠠᠨ ᠬᠢᠭᠡᠳ ᠨᠢᠳᠦ ᠶᠢ ᠨᠢ ᠵᠢᠷᠤᠵᠤ ᠪᠦᠲᠦᠭᠡᠭᠰᠡᠨ ᠦᠭᠡᠢ ᠭᠡᠳᠡᠭ ᠴᠢᠨᠢ ᠁ ᠬᠥᠭᠡᠷᠦᠬᠦᠢ᠂ | ᠶᠠᠮᠠᠷ ᠠᠵᠢᠯ ᠳᠤ ᠴᠦ ᠬᠢᠨᠠᠮᠠᠭᠠᠢ ᠬᠠᠨᠳᠤᠬᠤ ᠬᠡᠷᠡᠭᠲᠡᠢ ᠶᠤᠮ ᠰᠢᠦ︕︾ ᠭᠡᠵᠦ ᠦᠯᠦ ᠲᠣᠭᠤᠮᠰᠠᠷᠯᠠᠭᠰᠠᠨ | ᠬᠠᠷᠠᠴᠠ ᠪᠠᠷ ᠰᠢᠷᠳᠡᠭᠡᠳ ᠪᠠᠷᠠᠭᠤᠨ ᠭᠡᠷ ᠤᠨ ᠲᠤᠶᠠᠭᠠ ᠶᠢᠨ ᠵᠠᠬᠠ ᠳᠤ ᠣᠴᠢᠵᠤ᠄ ︽ᠴᠢᠨᠦ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ | ᠴᠠᠰᠤᠨ ᠬᠥᠮᠥᠨ ᠪᠣᠯᠵᠤ ᠪᠠᠶᠢᠨᠠ᠃ ᠭᠡᠲᠡᠯᠡ ᠨᠢᠭᠡ ᠴᠢᠬᠢ ᠨᠢ ᠬᠡᠲᠦᠷᠬᠡᠢ ᠳᠣᠣᠷᠠ ᠪᠣᠯᠵᠠᠢ᠃ ᠵᠠᠰᠠᠬᠤ ᠴᠢᠬᠤᠯᠠ ᠲᠠᠢ᠃ | ᠭᠦᠳᠡᠯᠮᠦᠷᠢ ᠭᠡᠵᠦ ᠬᠥᠯᠥᠰᠦ ᠶᠢ ᠠᠰᠬᠠᠷᠠᠭᠤᠯᠤᠭᠰᠠᠨ ᠴᠦ ᠬᠥᠮᠥᠨ ᠵᠤᠨ ᠤ ᠬᠦᠰᠡᠯ ᠢ ᠬᠠᠩᠭᠠᠳᠠᠭ ᠨᠢ ᠦᠨᠡᠨ︕︾ | ᠭᠡᠵᠦ ᠵᠠᠬᠠ ᠳᠠᠷᠠᠭᠠᠯᠠᠨ ᠰᠤᠷᠭᠠᠳᠠᠭ᠃ | ᠬᠥᠳᠡᠭᠡ ᠶᠢᠨ ᠪᠤᠭᠤᠷᠤᠯᠴᠤᠳ ᠤᠨ ᠬᠡᠦᠬᠡᠳ ᠢᠶᠠᠨ ᠰᠤᠷᠭᠠᠨ ᠬᠥᠮᠥᠵᠢᠭᠦᠯᠬᠦ ᠠᠷᠭᠠ ᠤᠬᠠᠭᠠᠨ ᠭᠡᠵᠦ ᠲᠠᠷᠡ᠃ | ᠡᠪᠦᠯ ᠤᠨ ᠴᠠᠰᠤᠨ ᠵᠤᠨ ᠤ ᠴᠡᠴᠡᠭ ᠠᠴᠠ ᠴᠦ ᠳᠣᠣᠷᠠᠳᠠᠬᠤ ᠦᠭᠡᠢ ᠴᠡᠪᠡᠷ ᠡᠷᠬᠢᠮᠰᠦᠭ᠃ ᠭᠠᠷ ᠤᠨ ᠠᠯᠠᠭᠠᠨ | ᠳᠡᠭᠡᠷᠡ ᠠᠶᠠᠷᠬᠠᠨ ᠪᠠᠭᠤᠬᠤ ᠬᠤᠷᠣᠮ ᠳᠤ ᠬᠠᠶᠢᠯᠵᠤ ᠤᠰᠤ ᠪᠤᠯᠬᠤ ᠪᠠᠷ ᠰᠡᠳᠬᠢᠯ ᠨᠢ ᠲᠤᠩ ᠵᠥᠭᠡᠯᠡᠨ ᠪᠤᠶᠤ | ᠬᠡᠪᠡᠷᠡᠭ ᠭᠡᠳᠡᠭ ᠲᠥᠷᠥᠭᠳᠡᠯ ᠥᠭᠭᠦᠨᠡ᠃ ᠭᠡᠬᠦ ᠳᠡᠭᠡᠨ ︽ᠬᠥᠯᠳᠡᠬᠦ ᠪᠠᠷ ᠬᠠᠲᠠᠭᠤᠷᠠᠳᠠᠭ ᠨᠢ ᠴᠢᠯᠠᠭᠤ ᠰᠢᠭ᠋ | ᠴᠢᠨᠠᠷ ᠲᠠᠢ᠂ ᠬᠠᠶᠢᠯᠬᠤ ᠪᠠᠷ ᠵᠥᠭᠡᠯᠡᠷᠡᠳᠡᠭ ᠨᠢ ᠳᠤᠷᠠᠯᠠᠯ ᠰᠢᠭ᠋ ᠬᠡᠪᠡᠷᠡᠭ︾ ᠭᠡᠳᠡᠭ ᠦᠭᠡ ᠪᠤᠢ ᠪᠣᠯᠤᠭᠰᠠᠨ ᠮᠠᠭᠠᠳ ᠠ᠋︕ | | ᠴᠠᠰᠤ᠂ ᠳᠣᠭᠳᠣᠯᠬᠤ ᠳᠠᠭᠠᠨ ᠤᠶᠠᠷᠠᠵᠤ ᠳᠣᠭᠰᠢᠷᠠᠬᠤ ᠳᠠᠭᠠᠨ ᠰᠢᠭᠤᠷᠳᠠᠭ ᠨᠢ ᠦᠨᠡᠨ ᠬᠤᠳᠠᠯ ᠬᠤᠶᠠᠷ ᠲᠤ | ᠬᠠᠨᠳᠤᠭᠰᠠᠨ ᠢᠯᠡ ᠲᠣᠳᠣ ᠣᠪᠣᠷ ᠭᠡᠵᠦ ᠪᠢ ᠦᠵᠡᠨᠡ᠃ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠤ ᠤᠶᠤᠨ ᠰᠠᠨᠠᠭᠠᠨ ᠳᠤ ᠬᠠᠷᠠ | ᠭᠦ᠋ ᠬᠦᠷᠭᠡᠬᠦ ᠦᠭᠡᠢ ᠬᠡᠮᠡᠨ ᠰᠦᠨ ᠥᠩᠭᠡ ᠪᠠᠷ ᠴᠠᠶᠢᠷᠠᠲᠠᠯᠠ ᠬᠠᠶᠠᠯᠠᠳᠠᠭ ᠨᠢ ᠴᠠᠰᠤ ᠪᠢᠯᠡ᠃ ᠭᠡᠷᠡᠯ ᠭᠡᠭᠡ ᠲᠠᠢ | ᠠᠮᠢᠳᠤᠷᠠᠯ ᠪᠠᠯ ᠪᠤᠷᠠᠮ ᠰᠢᠭ᠋ ᠠᠮᠲᠠᠲᠠᠢ ᠪᠥᠭᠡᠳ ᠠᠵᠠ ᠵᠢᠷᠭᠠᠯ ᠢᠶᠠᠷ ᠪᠢᠯᠬᠠᠮᠠ ᠪᠠᠶᠢᠳᠠᠭ ᠬᠡᠮᠡᠨ ᠥᠪᠡᠷ ᠤᠨ ᠢᠶᠠᠨ | ᠭᠡᠷᠡᠯ ᠢᠯᠴᠢ ᠶᠢ ᠬᠥᠮᠥᠨ ᠵᠤᠨ᠂ ᠠᠮᠢᠳᠠᠨ ᠭᠤᠣᠯᠲᠠᠨ ᠳᠤ ᠬᠠᠷᠠᠮ ᠦᠭᠡᠢ ᠶᠡᠭᠦᠯᠡᠬᠦ ᠴᠠᠰᠤᠨ ᠤ ᠶᠣᠰᠣ ᠶᠢ | ᠤᠬᠠᠭᠠᠷᠠᠢ︕ ᠬᠥᠮᠥᠰ ᠮᠢᠨᠢ᠃ | ᠲᠡᠰᠭᠢᠮᠡ ᠬᠦᠢᠲᠡᠨ ᠡᠪᠦᠯ ᠢ ᠲᠡᠰᠪᠦᠷᠢᠲᠡᠢ ᠥᠩᠭᠡᠷᠡᠭᠦᠯᠵᠦ ᠤᠷᠢᠨ ᠳᠤᠯᠠᠭᠠᠨ ᠬᠠᠪᠤᠷ ᠢ ᠤᠭᠲᠤᠬᠤ ᠪᠠᠷ | ᠬᠠᠶᠢᠯᠵᠤ ᠤᠷᠤᠰᠤᠭᠠᠳ ᠴᠡᠴᠡᠭ ᠬᠤᠸᠠᠷ ᠤᠨ ᠦᠨᠳᠦᠰᠦᠨ ᠳᠤ ᠠᠭᠤᠰᠤᠨ ᠰᠢᠩᠭᠡᠬᠦ ᠨᠢ ᠴᠠᠰᠤᠨ ᠤ ᠮᠥᠬᠦᠯ ᠪᠢᠰᠢ᠂ | ᠬᠠᠷᠢᠨ ᠠᠮᠢ ᠨᠠᠰᠤᠨ ᠤ ᠬᠢᠨᠢ ᠰᠢᠨᠡ ᠡᠭᠢᠯᠡᠯᠳᠡ᠂ ᠨᠣᠭᠤᠭᠠᠷᠠᠵᠤ ᠤᠷᠭᠤᠬᠤ ᠶᠢᠨ ᠬᠦᠰᠡᠯ ᠶᠤᠮ᠃ | ᠴᠠᠰᠤ ᠣᠷᠣᠬᠤ ᠪᠣᠯᠭᠠᠨ ᠪᠢ ᠮᠥᠷ ᠭᠠᠷᠭᠠᠶᠠ ᠭᠡᠵᠦ ᠪᠤᠳᠤᠳᠠᠭ ᠪᠥᠭᠡᠳ ᠮᠥᠩᠭᠦ ᠰᠢᠭ ᠭᠢᠯᠠᠯᠵᠠᠨ | ᠰᠠᠴᠤᠷᠠᠬᠤ ᠳᠤᠨᠢ ᠠᠭᠤᠰᠤᠨ ᠰᠢᠩᠭᠡᠭᠡᠳ ᠰᠢᠷᠬᠡᠭ ᠴᠠᠰᠤ ᠪᠤᠯᠬᠤ ᠶᠢ ᠳᠤᠷᠠᠯᠠᠨᠠᠮ︕ | ᠴᠠᠰᠤ᠂ ᠰᠦ ᠰᠢᠭ ᠠᠷᠢᠭᠤᠨ᠂ ᠰᠡᠳᠬᠢᠯ ᠰᠢᠭ ᠬᠡᠭᠡᠨᠴᠢᠷ᠃ ᠥᠴᠥᠬᠡᠨ ᠴᠦ ᠬᠤᠯᠢᠮᠠᠭ ᠦᠭᠡᠢ ᠲᠤᠩ ᠴᠠᠭᠠᠨ | ᠪᠣᠯᠬᠤᠷ ᠪᠢ ᠴᠠᠰᠤᠨ ᠤ ᠦᠩᠭᠡᠨ ᠳᠤ ᠬᠠᠮᠤᠭ ᠠᠴᠠ ᠳᠤᠷᠠᠲᠠᠢ᠃ ᠦᠨᠡᠨ ᠤ ᠭᠡᠭᠡᠨ ᠰᠦᠭ᠂ ᠦᠵᠡᠰᠭᠦᠯᠡᠩ ᠤᠨ | ᠭᠠᠳᠠᠨᠠᠬᠢ ᠦᠵᠡᠰᠭᠦᠯᠡᠩ ᠪᠣᠯ ᠴᠠᠰᠤ ᠶᠤᠮ᠃ ᠠᠭᠤᠯᠠ ᠭᠤᠤ᠂ ᠮᠠᠩᠬᠠ ᠵᠣ ᠶᠢ ᠮᠥᠩᠭᠦᠨ ᠥᠩᠭᠡ ᠪᠠᠷ ᠭᠤᠶᠣᠯᠠᠵᠤ | ᠴᠢᠮᠡᠨᠡ ᠭᠡᠳᠡᠭ ᠭᠠᠭᠴᠠ ᠬᠦᠰᠡᠯ ᠲᠠᠢ ᠴᠠᠰᠤᠨ ᠤ ᠮᠡᠳᠡᠷᠡᠮᠵᠢ ᠶᠢ ᠤᠬᠠᠭᠠᠷᠠᠵᠤ ᠰᠡᠷᠡᠬᠦ ᠳᠤ ᠲᠡᠭᠷᠢ ᠠᠴᠠ | ᠲᠣᠮᠢᠯᠠᠭᠰᠠᠨ ᠡᠯᠴᠢ ᠭᠡᠵᠦ ᠪᠢ ᠦᠷᠭᠦᠯᠵᠢ ᠪᠤᠳᠤᠲᠠᠬ᠃ ᠬᠠᠶᠠ ᠳᠠᠭᠠᠨ ︽ᠴᠠᠰᠤ ᠪᠣᠯ ᠵᠡᠭᠦᠳᠦᠨ ᠳᠤ ᠵᠢᠷᠭᠢᠭᠰᠡᠨ | ᠦᠷ ᠤᠨ ᠪᠣᠯᠵᠣᠮᠣᠷ᠂ ᠵᠢᠷᠭᠠᠯ ᠬᠤᠷᠤᠶᠢᠯᠠᠭᠰᠠᠨ ᠵᠦᠩ ᠰᠤᠪᠢᠩ ᠤᠨ ᠪᠦᠷᠢᠯᠸᠠ︾ ᠬᠡᠮᠡᠨ ᠳᠣᠭᠳᠣᠯᠬᠤ ᠶᠢᠨ | ᠡᠷᠬᠡᠨ ᠳᠤ ᠤᠶᠠᠩᠭᠠᠯᠠᠬᠤ ᠳᠤ ᠪᠦᠰᠡᠭᠦᠢ ᠮᠢᠨᠢ ᠡᠯᠭᠦᠨ ᠠᠪᠴᠤ ︽ᠴᠠᠭ ᠦᠶᠡ ᠶᠢᠨ ᠬᠥᠭᠵᠢᠯ ᠤᠨ ᠴᠡᠴᠡᠭ᠂ ᠴᠡᠩᠬᠡᠷ | ᠲᠡᠭᠷᠢ ᠰᠢᠭ ᠮᠢᠨᠤ ᠡᠬᠡ ᠣᠷᠣᠨ ᠤ ᠬᠠᠶᠢᠷᠠ︾ ᠭᠡᠵᠦ ᠪᠦᠬᠦᠯᠢ ᠪᠦᠲᠦᠨ ᠨᠢᠭᠡᠨ ᠪᠠᠳᠠᠭ ᠰᠢᠯᠦᠭ ᠪᠤᠯᠭᠠᠵᠦ | ᠬᠥᠭᠰᠡᠬᠦ ᠶᠢ ᠶᠠᠭᠠᠬᠢᠨᠠᠮ᠃ | ︽ᠴᠠᠰᠤ - ᠰᠠᠨᠠᠭᠠ ᠪᠤᠳᠤᠯ ᠢ ᠭᠡᠭᠡᠯᠡᠭᠰᠡᠨ ᠰᠦᠨ ᠤ ᠬᠤᠪᠢᠯᠪᠤᠷᠢ᠂ ᠤᠷᠠᠨ ᠰᠡᠳᠬᠢᠬᠦᠢ ᠶᠢ ᠨᠡᠭᠡᠭᠡᠭᠰᠡᠨ | ᠤᠷᠠᠯᠢᠭ ᠤᠨ ᠤᠤᠭᠠᠨ ᠪᠠᠭᠰᠢ᠃ ᠬᠤᠯᠪᠣᠨ ᠪᠣᠳᠣᠯᠲᠠ ᠶᠢᠨ ᠵᠢᠭᠦᠷ ᠢ ᠳᠡᠯᠡᠭᠰᠡᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠶᠠᠩᠵᠢᠠᠯᠾᠮᠤ᠂ | ᠬᠤᠷᠸᠠ ᠶᠢ ᠪᠠᠭᠲᠠᠭᠠᠭᠰᠠᠨ ᠠᠭᠤᠳᠠᠮ ᠡᠨᠡᠷᠢᠩᠭᠦᠢ ᠰᠡᠳᠬᠢᠯ ᠤᠨ ᠭᠡᠷᠡᠯ︾ ᠭᠡᠵᠦ ᠲᠥᠰᠥᠭᠡᠯᠡᠬᠦ ᠳᠤ ᠬᠤᠷᠠᠵᠤ | ᠵᠤᠵᠠᠭᠠᠷᠠᠭᠰᠠᠨ ᠴᠠᠰᠤᠨ ᠳᠡᠭᠡᠷᠡ ᠬᠥᠯ ᠲᠠᠯᠪᠢᠬᠤ ᠠᠴᠠ ᠪᠠᠨ ᠪᠢ ᠬᠠᠯᠢᠷᠠᠨᠠ᠃ | ᠴᠠᠰᠤ ᠣᠷᠣᠬᠤ ᠪᠠᠷ ᠮᠢᠨᠤ ᠨᠤᠲᠤᠭ ᠤᠨ ᠬᠥᠮᠥᠰ︽ᠬᠤᠷᠠ ᠲᠤᠨᠤᠳᠠᠰᠤ ᠡᠯᠪᠡᠭ᠂ ᠥᠭᠡᠳᠡ ᠡᠰᠡᠷᠡᠭ ᠵᠢᠯ | ᠪᠣᠯᠣᠨᠠ ᠳ᠋ᠠ︕︾ ᠬᠡᠮᠡᠨ ᠰᠢᠨᠡ ᠨᠢᠭᠡᠨ ᠵᠢᠯ ᠳᠡᠭᠡᠨ ᠢᠲᠡᠭᠡᠯ ᠨᠠᠶᠢᠳᠠᠯᠭᠠ ᠨᠢ ᠨᠢᠰᠦᠨ ᠭᠦᠷᠳᠡᠭ ᠢ ᠪᠢ ᠮᠡᠳᠡᠨᠡ᠃ | ᠬᠠᠶᠠᠯᠠᠬᠤ ᠴᠠᠰᠤ ᠬᠥᠷᠥᠰᠥᠨ ᠤ ᠴᠢᠭᠢᠭ ᠢ ᠬᠠᠮᠠᠭᠠᠯᠠᠨ ᠪᠠᠲᠤᠯᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠬᠤᠷᠠ ᠪᠣᠷᠣᠭᠠᠨ ᠢ ᠤᠷᠢᠨ | ᠵᠠᠯᠠᠬᠤ ᠲᠠᠯᠳᠠ ᠶᠢᠨ ᠤᠪᠠᠳᠢᠰ ᠴᠦ ᠪᠠᠶᠢᠯᠭᠦᠢ ᠳ᠋ᠠ︕ | ᠴᠠᠰᠤ - ᠰᠠᠶᠢᠨ ᠰᠠᠶᠢᠬᠠᠨ ᠤ ᠪᠡᠯᠭᠡ ᠲᠡᠮᠳᠡᠭ᠂ ᠰᠠᠨᠰᠠᠷ ᠣᠭᠲᠠᠷᠭᠤᠢ ᠠᠴᠠ ᠠᠰᠬᠠᠷᠠᠭᠰᠠᠨ ᠣᠳᠣᠳ ᠤᠨ | ᠭᠢᠯᠪᠠᠭᠠ᠃ ᠰᠠᠴᠤᠯᠢ ᠠᠴᠠ ᠤᠷᠭᠤᠭᠰᠠᠨ ᠰᠦᠵᠢᠭ ᠤᠨ ᠠᠮᠢ᠂ ᠰᠠᠷᠠᠨ ᠠᠴᠠ ᠰᠠᠴᠤᠷᠠᠭᠰᠠᠨ ᠵᠥᠭᠡᠯᠡᠨ ᠢᠯᠴᠢ᠃ | |